Shillong, Mar 3: Bharatiya Janata Party (BJP), Hill State People’s Democratic Party (HSPDP) aro Independent MLA sakgnian da•o Conrad K Sangma-chi dilenggipa National People’s Party (NPP) baksa bakrimahani gimin gnigipa changna NPP-ni dilanichi sorkariko rikpiltaina tariaha.
Iana skang, Sukrobar pringo NPP baksana BJP-ni MLA sakgni aro Independent MLA saksa, a•dokni Governor Phagu Chauhan-ko gronge sorkari rikna a•kangeahachim aro uandaken Sukrobar attamo HSPDP-ni MLA sakgni, chong•motan Shakliar Warjri aro Methodius Dkhar baksana Rambrai-Jyrngam-ni Independent MLA Remington Gabil Momin-ba an•tangtangni chakpaani chittiko, NPP-ni dilgipa Conrad K Sangma-na on•eaha.
NPP-ni sak 26 MLA-rang baksana da•o BJP-ni sak 2, HSPDP-ni sak 2 aro Independent sak 2 MLA-rangko channe gimik sak 32 MLA-rang gapahani gimin sorkariko rikna chu•ongaha.
Iana skang, Governor-ko grongeani somoio NPP-ni dilgipa Conrad Sangma, chief minister-ni kamko watna gita chittikoba on•jolbaahachim aro gital sorkariko rikna gitaba a•kangbaahachim.
Sorkariko rikna gita a•dokni Governor, Conrad-ko okamatchengaha aro Sukrobar attamo chakpaani chittirangko on•echina gitaba aganataha.
Da•o dipet Sohiong constituency-ni election-kode dingtang salona ra•doate dam 59 constituency-ni election-kosan ong•atengkuani gimin sorkariko rikna gita sak 30 MLA-rangkosan nangkuengpitichim.
Indake ong•engon, NPP-ni dilgipa Conrad K Sangma, re•baenggipa March-ni 7 tariko gnigipa changna a•dokni Chief Minister ong•e ku•mikchetanggen aro apsan salon uni minister-rangba ku•mikchetaniko dakanggen.
Koborko on•ani gitade, gital minister-rangni ku•mikchetanio a•songni Prime Minister Narendra Modi aro Union Home Minister Amit Shah-ba re•bae bakko ra•angnaba gnang.
