Shillong, Mar 5: Manderangni jakchi seokako man·gipa Hill State People’s Democratic Party (HSPDP) MLA sakgnini bimangrangko tarie so·anina Sonibar salo, National People’s Party (NPP)-ni national president Conrad K Sangma raken jegalataha aro ian manderangni namnike seokaniko jegalani gitasa ong·aha ine parakataha.
Sorkariko rikanio HSPDP-ni MLA sakgni, chong·motan Methodius Dkhar aro Shakliar Warjri-ba NPP baksa bakrimaniko on·ahachim indiba badiaba dolni ong·gija dakgipa manderang, Sukrobar walo, Laitumkhrah-o donggipa HSPDP MLA Methodius Dkhar-ni office-ko so·chipe galskaahachim.
Iandake manderangni jakchi seoka man·gipa MLA-rangni kosako ja·ku de·aniko jegalatengon, Meghalaya a·doko iandakgipa obostako changsaba chagronga dongkujachim aro iandakgipa kamko a·dokni manderang ra·chakna man·jawa ine Sangma parakataha.
Manderangni seoke watatgipa dilgiparangchisa sorkariko rikahachim ineba ua aganaha.
Meghalaya a·dokni manderang pangnan a·songni niam bidikko ja·rikgipasa ong·a ine janapatengon, ia election-oba manderangsa an·tangtangni namnikani gita dilgiparangko seoke watataha aro manderangni seokaniko pangnan mande ra·na nanga ine NPP-ni national president parakataha.
Iandakgipa ong·gija kamrangko pangnan saksa sakgni manderangni didianichisa ka·ronga ine janapatskaengon, mikkangchi iandakgipa a·selrang ong·jana gita sorkari, pilak nanga ja·kurangko de·anggen ine chief minister-na seokako man·taigipa Conrad Sangma parakataha.
Khasi chief minister-na dabienggipani bidingo janapatskaengon, a·songni dongimin niamrango pangchake pangnan manderangni namnikani gitasa ja·kurangko de·a aro chief minister-ko seokanioba dongimin niamrang donga ine Sangma parakataha.
