Williamnagar, July 1: Northeastern Hill University ni Degree ni porikao Loyola Kolej, Williamnagar-oni sak 12 chatro chatrirang University ni nambatgipa sak 10 ko biming segatanio biapko man·paaha. A·chik a·songni gipin kolejrangoniba nambatgipa sak 10 o biming nagenchimoba, sak 12 chatro chatrirangni biming naanichi Williamnagar ni Loyola Kolej-an nambate dakgipa Kolejrangoni ge·sa ong·aha.

Hub News, ia nambatgipa sak 10 o biming nagipa adita chatrirangko uamangni chu·sokanina gronge agangrikangaha. Majoni Sultana jean English-o skanggipa gadang ko man·ahachim, ua chononin Williamnagaro poraiaha. Ua saksa Williamnagaro mesu palgipani deme·chik ong·enchimoba uni rake aro bimchipe kam ka·anichi ia gadangko man·aha. Pilak chatro chatrirang ianiko skie ra·na nanga maina nang·o bimchipani aro rake kam ka·ani donggenchimode na·a je dakgipani degipa ba ong·china indiba chu·sokani ko man·telaia. Hub News Majoni Sultana ko sing·on, ua an·tangni kusi ong·aniko kattachide tona amjaha ine agane uni skigiparang, uni ma·gipa pagipa aro kolej na nama bimungko ra·banna man·ahani gimin kusi ong·aha ine aganaha. Ua Garo Hillso donge nama ripengrangko man·aha aro mamung neng·nikani gri kusi ong·e dongna man·ahanina A·chik a·songkoba mitelaha.

English Department ni Margaritha Ch. Marak jean gittamgipa biap-ko man·ahachim, ua ia gadang ko man·na maming ka·dongsoani dongjachim ine aganchake, poraisamsoani rangko bilakbatatgenchimode nambata gadangko man·genchim ine aganaha.

Bon·kame Hub News, Education Department ni Hiramoni Kalita baksa agangrikaha. Ua saksa gittamgipa gadang ko man·gipa ong·a. Uaba chononin Williamnagaro donge Loyola Schoolo nape poraibaaha. Ua ia gadang ko man·na ka·dongsojachim, indiba da·o ia gadang ko man·ora an·tangoni a·bachenge nokdangni mande gimikan katchaaha aro rasong chabeaha ine aganaha.

Loyola Kolej-ni Principal Fr. Sunny Augustine ko ia nambegipa gadango nang·ni student rangni pass ka·anina na·a maidake nika ine sing·on, ang·a aro angni kolej-o skigiparang gimikan bilongen kusi ong·aha ine aganaha. Maidake Loyola Kolej-ni chatro chatrirang namgipa biterangko man·aha ine sing·on, chinga uamangna namgipa miksonganirangko (great goals) on·rong·a, aro uamangna chu·sokaniko cha·tote nina gita dakchakronga, indake uamang changsa mangmang chu·sokaniko cha·totmanahaode pangnan chu·sokaniko man·na gita daarironga ine aganaha.