Shillong, July 12: Giproroenggipa sajinmani kosako dakgrikanina mikkangchi namgipa kamna didianiko on·ani gita a·dokni autonomous district council (ADC)rangni jak gita dorbar shnong-rangna tangka-paisachi dakchakanirangko on·china Hynniewtrep Youth Council (HYC), a·dok sorkariko mol·molangaha.
Skotong minister Pa Conrad K Sangma aro dakchakgipa skotong minister Pa Prestone Tynsong-maangni jako Sombar salo memorandum-ko on·anggipao, Covid-19 sabisini giproroanichi iani kosako dakgrikanio Dorbar Shnong-rangni bakrime kamko ka·ani aro pilak daitorangko ra·ani, gimikna bateba da·o namen gamchatbataha ine HYC-ni general secretary Roy Kupar Synrem janapataha.
Ia sabisi baksa dakgrikanio dingtang dingtang kamrangko chu·sokatna gita a·dok sorkari aro uni department-rang Dorbar Shnong-rangni chu·gimik bakrimanikoba nangaha ine aganenba, a·jatangtango ia sabisiko warachakna sorkari baksa iamang pilak daitorangko ra·e bakrimjagenchimode a·dokoniko ia sabisini giproroaniko champengna namen rakbegipa kam ong·genchim, uni gimin dorbar shnong-rangni on·gilanirangna aro bakrimanina uamangko mittelna krachongmota ineba ua janapataha.
“A·dok sorkari ba ADC-rangni gita ra·chakaniko man·jaoba ba tangka-paisarang dongjagenchimoba uamang gittimni manderangni on·gilpaa baksa bang·gija man·ani cholrangchi pilak daitorangko ra·e bakrime kamrangko ka·tokaha ine iachi ma·siatna gita nangnika” ineba Synrem janapataha.
“Uni gimin uamangni dangdike on·ani kamrangna mitttelpilskae mikkangchiba indake a·dokni manderangni namgnina a·dok sorkari baksa ka·mabatgipa gadangoni kamrangko ka·angkuna namgipa didianiko on·ani gita a·jatangtangni ADC-rangni jak gita Dorbar Shnong-rangna tangka-paisachi dakchakaniko on·pachina nang·ni office-ko aro a·dok sorkariko dingtangmancha mol·mola,” ineba ua janapatjolaha.
