Shillong, March 14: Adita salrangna skang Assam a⋅dokoni officer-rang re⋅bae Meghalaya a⋅dokni ning⋅o biap a⋅kangdrae sima ariko songe donangahachim. Hyniewtrep A⋅chik National Movement aro NGO-rang nangrime sima kangdrae pillar song⋅anggipako pike a⋅dokni mongsonggipa office secretariat-ona ra⋅baaha.

NGO-ni dilgipa Pa John Sangma-ni aganani gita Assam a⋅dokni sima ariko niamgri songdrae ari sale ra⋅ani ia skanggipa chang ong⋅jachim ine aganaha. Ian Jirang constituency-ni ning⋅o donggipa Umsrui songo ong⋅enga obosta aro ian Jirang Syiemship-ni ning⋅o ga⋅aka. Unigimin a⋅dok sorkari ua Syiemship-ko okame sing⋅sandianiko dakna nanga aro District counsil a⋅doktangni sima ariko nirokna nanga maina ua jolo songdonggiparang sima ariko ra⋅en kajia golmal ong⋅anio bilsi rikitan an⋅chi pari nikaona sokpilronga indiba je obostaoba a⋅doktangni a⋅ako jakpasaba wate on⋅na man⋅jawa ine Pa John Sangma raken aganaha.

Skotong Minister Pa Conrad Sangma-ni dilenggipa MDA sorkari-ni sima arirangko tik ka⋅e on⋅a rakken kam ka⋅enganina mitelan baksa sima arini neng⋅nikaniko namatsrange on⋅a man⋅ode re⋅baeenggipa 2023 election-o NPP dol bilakbate sorkariko riktaipilna man⋅gen ineba John Sangma agandapaha.