Guwahati, June 8: Assam a·doko songdongenggipa manderangko bol-wa·arangko jakkalanio simsakchina gita didianirangko on·na aro a·dokoni tangsekgilgil biaprangko apalbatatna gita miksonge ia bilsini October 2 tariko ‘Gandhi Jayanti’ ba a·songni pagipa Mahatma Gandhi-ni atchiani salko manianio Assam a·dok gimiko pang kror 1 bol chararangko ge·gen ine Bristibar salo, Assam-ni skotong minister Pa Himanta Biswa Sarma parakataha.
Amrit Plantation Programme-ko Kamrup-ni Chandubi-o Bristibar salo ong·atanggipao bakko ra·e jinmana aganprakangengon, Pa Sarma, a·doko bol chararangko ge·gipa mande sakantinan gong 100 ko mittelpilskaani pal on·a baksa, ge·gimin bol chararangko simsake bilsi-gittamna tangatode gong 200 ko on·angkugen ine parakatan baksa, ia pang kror 1 bol chararangko ge·nasienggipa mande sakantian uamangni biapko janapa baksa web portal-o bimingko segatna gita nanggen ine u·iatangjolaha.
1891 bilsio a·doko ra·gatgipa Assam Forest Regulation-ni gimin aganangskaengon, sorkarini bil on·aniko ra·na nangmangija pale cha·na namgipa bolrangko ge·e uarangko den·e pale cha·na gita manderangna bilko on·e ua niamko da·o namdapataha ba taridapaha ineba Pa Sarma aganangaha.
