Tura, Dec 21: Kusin Krismas, Katchan Krismas salko pilak Kristian bebe ra•giparang kusi ong•e manironga, ia Krismas salara dal•batsrangigpa Kristianrangni Kusi ong•e maniani sal ong•achim. Bilsianti Kristian Bebe Ra•giparang December 25 tariko Krismas-ko manironga aro ia salko Garo Hills-osan ong•aigija a•gilsakni gimikni dingtangdingtang biaprango dongenggipa Kristianrang kusi ong•bee manirongenga.
Kristian bebe ra•giparang, chongmotan gisik a•ning bitgipa manderangni Jisu Kristo-ni gimin aganrittingbaani gitade December 25 tariko a•gilsakni Raja, Isolni saksakamkam depante jean manderangni janggiko jokatgipa aro manderangni papna sichakgipa ‘Gitel Jisu Kristo’ Betlehem songjinmani matchu nolo walni 12 bajio atchiaha ine aganani gnang.
Ia dal•begipa Kristian sakanti bebe ra•giparangni Krismas salko manina sakantian kusi ong•bee sengsoe dongengon, mingsa neng•nikanichi ia bilsio ja•dongataha maina a•gilsako namjabegipa sabisi giproroengani gimin ia sabisiko champengsona gita a•songko sason ka•enggiparangni on•gimin niamko ja•rikesa Krismas-ko manina ge.etaniko on.a. A•songko sason ka•enggiparangni dongimin niamara je biapoba mande jinma tom•dakchina,ku•sikrango pindapgipa gananirang (Mask)-rangko ganchina, saksa sakgipin-oni chel•tanggrike dongchina aro jakrangko pangnan rongtale jaksujringchina ge•etaniko on•ahachim. Ia niamrangko ja•rikna nangani a•sel Kristianrangni dal•batsranggipa Kusin Krismas battanggimin bilsirangona bate ia bilsio namen komibate nikna man•enga.
Bilsianti Krismas sal sokbaengon manderang dingtangdingtang rongrangni ching•chetgipa light-rangchi nitobee tarisoanirangko nikna man•achim, indiba ia bilsio nitoe tarianirang namen komiaha. Bang•a manderang Jisu Kristo-ni atchiani salko kusi ong•e manina gita noktangtangko,sa•ra nokra-rangko aro sorok ramarangko rongtal an•talatan baksa nitoe tarienba Krismas salko nichaksoronga. Apsandake manderang gittimtangtangko nitoatna dingtangdingtang rong gnanggipa ching•chetgipa light-rangchi bol bipangrango, nok mikkangrango, sorkarini kam ka•ram nokrango aro pilak napram cholgugarango tarie nitoatrongachim. Indiba sorkarini dongimin niamko ja•rikna nanganichi chu•gimik nitoatanirangko tarisona man•jaha. Indake ia bilsini Krismas salko bang•a manderang aro Kristian bebe ra•giparang niamko chu•sokatna mangmang noktangtango nape Krismas-ko manina gita nangaha.
Indake ong•genchimoba sakantina Nokgipa Isol-ni bang•bea pattidapani ong•china, chinga Media dolni gita nama sikaniko on•atenga, Sakanti aro nokdangantini manderangna ia 2020 bilsini Krismas chu•sokgipa aro tom•tomgipa sal ong•china. Sakantinan ‘Merry Krismas’.
