Tura, April 27: Sorkariko chalaianio manderangni kusiko nikna man•na gita ia bilsioni da•o bilsi bongana Meghalaya a•dokni budget-o Happiness Index-koba MDA 2.0 sorkari jako ra•na tik ka•aha ine Bristibar salo, a•dokni Chief Minister Conrad K Sangma parakataha.
NPP West Garo Hills unit-ni gita Tura-ni District Auditorium-o mande ra•pilskaani program-ko ong•atanio iako a•dokni Chief Minister parakataha.
Chief Minister-ni parakatani gitade, sorkariko chalaianio manderangni kusi ong•ani aro chu•ongnikaniko man•na gita Happiness Index-ko a•dokni budget-o ra•na tik ka•aha.
Happiness Index-ko budget-o ra•na gita sorkarini chanchichengani somoio bang•a manderangan jajae iani bidingo uo sing•tokaha ine janapatengon, “Anga uamangna mingsakosan aganaiaha, uan – Kusinide a•paloni ong•na nangja, ning•onisa ong•na nanga. Sorkarini kamo manderang chu•ongnikode uamang kusiba ong•a,” ine Sangma aganaha.
Manderangni bakrimanichi sorkarini bil aro sorkari apsan re•na gita nanga ine janapatengon, iani giminsa ia bilsi dipet Happiness Index-ko a•dokni budget-o ra•na tik ka•aha ine Chief Minister parakataha.
India a•song gimiko Mizoram a•dokan kusi ong•batsranggipa a•dok, Kanpur songjinmara kusi ong•batsranggipa songjinma aro a•gilsak gimiko kusi ong•batsranggipa a•songara Europe-ni Finland a•song ong•engachim ine nikna man•a.
Iakoba poraie nina man·gen: M’laya CM aro Assembly Speaker-na mande ra·pilskaaniko daka
