Adokgre, March 15: Bilsi kolatchina bate A·dokgreoni wenchenganian Purno A Sangmana cheani tabisi gita ong·aha. Ua eleksin somoio pangnan ua joloni wenna a·bachengrongaha, aro pangnan cheaha.
Ua jripjrip dakgipa, mi a·palrang iachi uachi dakgipa biap North Garo Hillso Kharkutta blockni ning·o donga. Bilsi bongaprako uanon PA Sangmani eleksinna wenchakatna sokango kusi ong·e rimchaksorongachim.
A·dokgreoni wenchengo cheaniko PA Sangma bilaken bebe ra·aha aro indaken ua biapko Chenanggre ineba mingaha.
Da·alo uni demechik Agatha K Sangmaba pagipaba ja·kuko ja·riken Chenanggreoni wenchakatna a·bachengaha.
Agatha K Sangma baksa uni ma·gipa Soradini K Sangma, uni adatang sakgni — Conrad K Sangma aro James K Sangma, uni segipa Dr. Patrick Marak dongpaaha. Pagipani ku·pattirongako Agataha aganaha.
“MP ong·e dakgni kamara elakatangni manderangni nangniknanirangna dakgrikanian ong·a ine angni pagipa pangnan aganrongaha. MP ong·e anga manderangni nangnikanirangko sorkarini mikkangona ra·angronga, indiba bon·kamgipa chango an·ching chu·onga gita MP schemerangko ma·mong sorkarioniko man·bajaha.”
Ma·mong sorkarioniko chu·onga gita schemerangko man·bajahaoba te 30 community hallrangko, dam 90 mortar bridgerangko, 118 CC footpathrangko, kal·susaani bakrarangko rikan baksa bang·a skul nokrangkon taridapna man·aha ine ua aganaha.
Garo aro Khasi ku·sikrangko Indiani Constitutionni 8gipa Scheduleo napatna Parliamento ku·rang on·ronganikoba ua janapaha.
Agathani wenanio chakpae, Chief Minister Conrad Sangmaba A·dokgreoni wenchengani mongsonggipa ong·aniko aganpaaha.
“MP, MLA aro MDC eleksinba ong·ja maina, PA Sangma pangnan A·dokgreoni wenna a·bachengronga, maina ua Chenanggre ina bimingo cheaniko bebe ra·a. Uan ia bakrao aganchakna chone tarichakgipaoni a·bachengaha, aro da·ode ua biapo dal·begipa stadiumo chinga na·simangni mikkango chadenge an·chingni dilgipani jumang niksoaniko chu·sokatenga” ine Conrad K Sangma aganaha.
“Skang salrango sorok namkujamiting salrangode ia biapara Assamni ning·oma ine bebe ra·na nampilachim, maina rama namjaode Garo Hills inrongachim. Indiba da·ode indake ong·jajok” Conrad aganangkuaha.
Conrad K Sangmani bebe ra·ani gitade ia changni eleksinode NPPni cheania skango PA Sangmani siani ja·mano uni lak 1.90 bata voterangchi cheanaba batangkugen. “Ia chango lak 2.50 ba lak 3 batachi NPP chegen ine anga ka·donga” ine ua ka·donge aganaha.
Na·simang iakoba poraina man·gen:Meghalaya a•doko CAA-ni chapter bon•aha: BJP
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter-twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
