New Delhi, June 8: 2024 bilsini June 8 tarik Indian Military Academy-ni ma·ambio mongsonggipa sal ong·gen, maina ia salo 154 Regular Courseni aro 137 Technical Graduate Courseni sak 394 Officer Cadetrang porikao name aro chu·soke matchotangtokaha. Uano meli-nangrimgipa gipin a·sonrangoni sak 39 Officer Cadetrangkoba man·chapa.
Officer Cadetrang namen mikchikkime dakmesokaha, Sare Jahan Se Achha aro Kadam Kadam Badhaye sulrangna ma·rape ja·ku de·e re·jomtokaha. Uamangni ma·a paa, ripengska aro bakdrang uamangni ja·gambee dakmesokaniko rasong chae nie kusi ong·tokaha.
Northern Commandni GOC-in-C Lt. Gen Suchindra Kumar parade kal·aniko nirokaha. IMA trainingo name chu·soke matchotanggiparangna ua katcharimaniko aganaha. Uamangkosan ong·ja, mikchikkimbee parade kal·aniko skigipa officerrangnaba ua rasong on·e de·doe aganaha.
Parade kal·aniko nirokgipa Reviewing Officer aganaha: “Da·alo na·simangni nambee parade kal·anian na·simangni trainingni matchotani aro na·simangni kamko jako ra·ani a·bachengani ong·a. Ian saksa sipaini janggi tangao changsasan sokbana man·aia, aro na·simangni nambee dakania gipinrangkoba de·chaoe didiatgipa ong·gen. Da·alo na·simangni ku·mikchetanirang a·songna rongtalgipa ong·a, aro uan na·simangni pilak dakgnirango dilgipa ong·gen. Da·alo na·simangni bilake aro rasong chae iano chadenganian officer ong·na na·simangni rakbee kam ka·ani sakki ong·a. Indian Military Academy chubegipa gadangni ong·a, aro uan da·alo na·simangni gunko bikote chiripaha. Ia salni bako, angni namnikbeaniko commandant, instructorrang aro ia military academyko chalaigiparangna parakna kusi ong·a.“
Reviewing Officer, Passing Out Course-o aganengon, Indian Armyo a·gilsakni gita nambatgipa sipairangni donganiko agantaitaiaha. Jensalo Indian Armyo napa unon ka·dongani, bakrimani, kakket ong·ani aro cholon bewal gimikkon nia ine ua aganaha. Chu·sokanio sokna gita an·tangko gaora dakgijaniko aro dal·batgiparangni ku·pattianirangko ra·na nanganiko ua raken aganaha.
Dakgrikani bewalrango dingtangroroaniko ua aganaha. Technologyni gita dingtangrorobaanian chasong gitalo dakgrik dinggrikani bewalrangkoba dingtangatroroa ine ua talataha. Ia chasongni dakgrik dinggrikanio Information Warfare, Drone, Autonomous System, Cyber, EM Spectrum, mande aro machine nangrime kam ka·ani, aro uandakgiparangan mongsong ong·aha ine ua aganaha. Iarangni a·selan armyni kamrango salantian miktuatgija gital gital u·i¬-ma·sina nanganirang ong·katroroa; ia chasongni dakgrikanide gisik-mikta aro gital cholko bikotna changaniosa pangchakbataniko ua aganaha.
Reviewing Officer dingtang dingtang awardrangko on·aha. Sword of Honour awardko AUO Praveen Singh; Order of Meritni gita skanggipa biapko man·gipa Officer Cadetna Gold Medal on·aniko AUO Praveen Singh ra·chakaha. Silver Medalko ACA Mohit Kapri ra·chakaha, Bronze Medalko BUO Shaurya Bhatt ra·chakaha.
Technical Graduate Courseo Order of Meritni gita skanggipa ong·gipa Officer Cadetna Silver Medal on·aniko Offr Cdt Vinay Bhandari ra·chakaha; gipin a·songoni re·bagiparangni gisepo Order of Meritni gita skanggipa Officer Cadetna on·gipaa Bangladesh Medalko FOC Mohammad Nur Kutubul Alam ra·chakaha; 2024 bilsini Spring Term-o gimikni gita nigope dol 12 companyrangni gisepo nambatgipako basee on·gipa Chief of Army Staff Bannerko Kohima Company man·angaha.
Na·simang ia video-koba nina man·gen:
Na·simang iakoba poraina man·gen: Arunachal Pradesh-ni IPS officer Robin Hibu DGP Rank-ona ra•doako man•a
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- https://www.instagram.com/ne_media_hub
