Tura, Mar 30: ICFAI University Tura Campus-ni District Football Association aro West Garo Hills District Sports Office baksa nangrime ong·atanggipa Super 5 NJY Memorial Cup 2025 Futsal Tournament-ni final match ba bon·kamgipa kal·susaaniko Sonibar salo, Evening FC aro Blitz Wolf dolrangni gisepo kal·susaangaha aro ia kal·susaanio Evening FC, goal 3-1-chi chegipa ong·aha.
Evening FC-na Tremarchwall Ch Marak, goal-gniko aro Pinkachu A Sangma goal-sako chipe on·aha aro Blitz Wolf dolna William Raksam Marak, goal-sako chipe on·skaaha.
Ia kal·susaanio chegipa ong·e Evening FC, gong 30,000 tangka baksana trophy-ko boksis dake man·angaha aro Blitz Wolf dolba, gong 20,000 tangka baksana runner up trophy-ko boksis dake man·skaaha.
Ia kal·susaanio dingtang dingtang boksisrangkoba on·angaha aro uan Best Player-ni boksisko Evening FC-ni Easter Salchang Ch Sangma-na, Highest Goal Scorer-ni boksisko tournament gimiko goal 9-ko chipgipa Evening FC-ni Tremarchwall Ch Marak-na aro Best Goalkeeper-ni boksisko Blitz Wolf-ni Sengrang R Marak-na on·angaha.
Ia salni bako dingtangmancha ICFAI aro Mason Phillips Academy-ni gisepo exhibition match-koba ong·atangaha aro ia kal·susaanio, Mason Phillips Academy, goal 2-1-chi ICFAI-ko chena man·aha.
Garo Hills-o skanggipa aro saksakamkam me·chik referee ong·ahani gimin ia salni bako dingtangmancha Regina R Marak-na mittelpilani boksiskoba on·angaha.
Ia Super 5 NJY Memorial Cup 2025 Futsal Tournament-ko March 27 tarikoni a·bachenge salgittamna ong·atangaha aro ia kal·susaanio dol 30 club-rang bak ra·angtokaha.
Ia tournament-ni bon·kamgipa kal·susaanio, West Garo Hills a·jani Deputy Commissioner Jagdish Chelani, Sports & Youth Affairs-ni gitcham Deputy Director Jasper P Marak, ICFAI University-ni Vice Chancellor Alicia Gatphoh, West Garo Hills-ni District Sports Officer Saljagring M Marak, ICFAI University Tura Campus-ni Advisor aro Campus Incharge Dr Viola Sonatchi B Sangma aro gipinrangba dongpae bak ra·angtokaha.
Na·simang ia video-koba nina man·gen:
Na·simang iakoba poraina man·gen: Journalist Dilwar Hussain Mozumdar pattok-oni joka, namgijani kosako sing·anirangko dakangkuna ku·mikcheta
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
