Shillong, Jan 2: Adita salrangna skang, Shillong songjinmao IED bomako gopretanio bilsi sokkugijagipa chadambe saksaba jak dongpaahani gimin Meghalaya a•dokni Social Welfare Minister Kyrmen Shylla, suk ong•gijaniko parakataha.
Iani bidingo kobor ra•timgiparang baksa agangrikengon, bilsi sokkugijagipa chadamberangan bobil dake chakatgipa dolrango napanganiara namen dukni katta ong•aha ine Shylla parakataha.
Dambe bi•sarangni iandakgipa bobil dolrango napanganiara bon•kamao uamangni janggi tanganion bon•chipaniko ra•bagen ineba Social Welfare Minister, suk ong•gijaniko parakataha.
Bobil dake chakatgipa dolrango nape an•tangtangni janggirangko rusigaljachina gitaba ua a•dokni chadamberangko didiataha.
Da•ororo chadamberang maini gimin iandakgipa kamrangko ka•na draatako man•tokenga, iani bidingo Social Welfare department am•sandigen ineba Minister aganaha.
