Shillong, Mar 14: Shillong-ni Institute of Hotel Management (IHM), LPG connection aro ia jolrango COVID man•e sigiparangni bidingo RTI ka•e man•aniko saksa Disparsing Rani, jinmana parakataha.
Disparsing Rani-ni RTI ka•e man•aniko parakatani gitade, IHM Shillong-o sanction ka•gimin ge 16 kamrang dongachim aro ianoni ge 8-de da•o dipet bangbang ong•e dongengachim.
IHM Shillong-o da•o dipet contractual post ge 1-chi chalaienga aro ge 10 post-rangkode dingtang dingtang dolrang gita contract on•engani gimin ia institute-o kam ka•giparang aro skigiparang chu•ongjaenga ine Rani parakataha.
LPG connection-ni bidingo RTI ka•e man•gipani gimin janapatskaengon, ia jolrango da•o indin LPG chate on•aniko dontongataha indiba India sorkarini ning•o donggipa Hindustan Petroleum Corporation Limited-ni report-ko on•ani gitade, PMUY-ni ning•o da•oba a•song gimikon LPG-ko indin chate on•engkua ine Disparsing Rani parakataha.
COVID man•e sianggiparangni bidingo RTI ka•e man•aniko parakatskaengon, COVID man•e sianggipa mandeni nokdangna gong 50,000 ka•e on•china Supreme Court, State Disaster Response-ni ning•o National Disaster Management-na ge•etaniko on•ahachim ine Rani parakataha.
Rani-ni parakatani gitade, a•doko COVID man•e sianggipa manderangni nokdangrangna Revenue & Disaster Management Department, State Disaster Response Fund (SDRF)-oniko gong 6,66,00,000/- (crore dok lak sotdok) tangkarangko gamaha indiba dol 10-mangni gita nokdangrangde ia tangkarangko ra•na gita department-na u•iatani ja•manoba tangkarangko man•tokkuja ine badi ka•doangaha. Iani bidingo ta•raken sandirokatenba nanga gita ja•kurangko de•china gitaba Rani didiataha.
