Shillong, July 19 : A•gilsak gimikoni dingtang dingtang institute-rangoni re•bagipa sak 400 chatro chatrirang uamangni bida-ko ra•na re•mikkanganiko “Campus in Clouds”-o a•bachenganggen.
IIM Shillong jekon “Campus in Clouds” ineba u•itoka aro ian nitobegipa a•brirangni gisepo donggipa nitoriri dakgipa samtangtang aro nina namen nitobegipa biaprangko miksonga.
Ia 2024-26 Post Graduate Program (PGP) Management batch me•a me•chik apsan ong•aniko mesoka, jeon 45% me•chikrang aro 55% me•asarang gnang. Iano bang•bata chatro chatrirangni bilsirang 23.7 ong•engon, iano bak ra•giparangoni bilsi komibatgipa uan bilsi 20 ong•gipa aro bilsi batgipa uan bilsi 29 ong•gipa ong•a.
Iano bak ra•giparang sakantian dingtang dingtang academic background-oni re•bagiparang ong•a, chongmotan 35%-de Engineering degree donggiparang aro 65% -de Non-Engineering degree donggiparang ong•skaa. Undergraduate-na agre, gipin bak ra•giparangara MA, MCom, ME, MS/Msc, MSc-Integrated aro MTech-Integrated pass ka•giparang ong•a.
Ia bilsi IIM Shillong sak 400 bak ra•giparangko 2024-26 PGP batch-na seokako man•aha. 2008 bilsini July 8 tariko a•bachengataoni ian 17-gipa batch ong•enga.
2024-26 PGP-na admission ra•anio, CAT porikkaoni name nianiko dakangaha. Ia bilsio, IIM Shillongna dorgasto galgiparang sak 2,29,533 gapachim. Re•anggipa 2024 bilsini February jaoni April jaona, mongsonggipa biaprang jekai, Mumbai, Bengaluru, Hyderabad, Delhi aro Kolkata-o Personal Interview (PI)-ko name cheke ra•aniko dakna man•a gita ong•atangaha. Indake, ia sak 400 bak ra•giparangko PGP 2024-26 batch-na seokako man•aha.
IIM Shillong-ni Director Prof. D. P. Goyal, admission ra•na gita name cheke nianio chu•sokaniko man•a gita dondikgija jotton ka•anina rasong on•e aganangaha. Indake ong•engon, Shillong jekon Salgro Salaram jolni education hub ineba u•iachim, ia biapo a•songni ning•o naljokbatgipa biap ine nama bimungko man•gipaba ong•a. Poraichakenggipa biapo kenani gri ong•ani gamchataniko aganengon, ian poraianio tang•doaniko ra•bana dakchakan baksana uamangko dal•roronaba dakchaka.
2007 bilsio a•bachengataoni, bilsi 16-na batpile 7-gipa IIM ong•e, ia institute namen chu•sokanirangko man•aha. Ia institute bang•a award-rangko man•e niksenganikoba man•aha, jean ia institute-ni poraianio name dakna on•kanganiko aro management education-o gital dakanirangko ra•baanikoba mesoka. Uasan ong•aigija, IIM Shillong, a•songni nambatsranggipa institute-rangni gadangona sokdona gita man•aha.
Na·simang ia video-koba nina man·gen:
Na·simang iakoba poraina man·gen: CNG-na VAT ba kajina gamaniko 5%-ona Assam sorkari tang•onata
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.co
Instagram- https://www.instagram.com/ne_media_hub
