Shillong, April 5: Meghalaya a·doko niam gri napsrukanirangko champengna gita Inner Line Permit (ILP)-ko ra·gatani ja·mansa rel garirangko ra·chakama ra·chakjawa ukode chanchirimna man·gen ine Khasi Students Union (KSU) parakataha.
Mongolbar salo, general executive council-ni tom·anio iako KSU-ni membor-rang chanchirimangaha aro re·baenggipa May jani 6 tariko KSU-ni gital central executive committee-ni election-ko ong·atna gitaba tik ka·angaha ine KSU-ni president Lambokstarwell Marngar parakataha.
KSU president-ni parakatani gitade, 1987 bilsioni Meghalaya a·doko ILP-ko ra·gatchina dabiengahani gimin da·o uamangni dabianiko bilakbatatna gitaba ia tom·anio KSU-ni membor-rang tik ka·e donangaha.
ILP-ko ra·gatchina gita 2019 bilsini December 19 tariko a·dok sorkarini resolution-ko pass ka·angani ja·man KSU-ni gitaba iani bidingo a·songni Prime Minister-na sedoatahachim indiba da·alonan ma·mong sorkari, a·doko ILP-ko ra·gatna gita maming ja·kurangko de·jaenga ine Marngar parakataha.
ILP-ko ra·gatgenchimode railway project-rangko KSU ra·chakgenchimma ine sing·anina aganchakaniko on·angengon, KSU-ni skanggipa dabianian ILP-na ong·engani gimin ILP-ko ra·gatani ja·manosa railway project-rangko ra·chaka ra·chakjani giminde KSU chanchianggen ine Marngar parakataha.
