Shillong, Aug 11: Meghalaya a•doko Inner Line Permit (ILP)-ko ra•gate on•china dabianiko ma•mong sorkari knachakjaengani gimin Budbar salo Jaintia Students Union (JSU), jingjengataniko dakangaha.

JSU dolni jingjengatani bak gita Budbar salo uamang, Jaintia Hills-o kam ka•enggipa Non-Tribal-rangoniko nangchongmotgipa lekkarangko sandiangan baksana JHADC-ni on•gipa Trading Licence donggijagipa dokkanrangoba chipattokaha.

Jaintia Hills-o kam ka•enggipa Non-Tribal-rangoniko JSU-ni manderang, Jowai, Khliehriat aro Jaintia Hills-ni dingtang dingtang biaprangoba lekkarangko am•sandiangaha.

Mikkangchiba apsan daken uamang, Jaintia Hills-o kam ka•enggipa Non-Tribal-rangoniko nangchongmotgipa lekkarangko sandiangkugen aro lekka donggijagipa manderangkode uamang songtangtangona re•angpilchina ge•etgen ba lekkarangko tarie ra•china ge•etgen aro Jaintia Hills-o dokkan dakenggiparangkoba Trading Licence donggijagiparangkode mikkangchi uamang chipe donattokgen ine JSU-ni dilgiparang parakataha.

Meghalaya a•doko ILP-ko ra•gate on•jaskal uamang iandake jingjengatanirangko dakangkugen ineba JSU parakataha.