Shillong, Feb 13: Gipinchini napbagiparangko nichokkiatna gita Inner Line Permit (ILP)ko Meghalaya a·doko ra·gatna ma·mongni somoiko ru·utatengani gimin suk ong·jae, Meghalaya Democratic Alliance (MDA) sorkariko a·doko ILP-ko gong·raken ra·gate on·angchina ma·mong sorkario su·dodoanganiko nangnike Hill State People’s Democratic Party (HSPDP) dol mijalo didiangaha.
A·dokni assembly-o jinmani ra·chakanggimin ILP-ko agangrikanio ma·mongni gisiko nangbregija dake ru·utatengani gimin suk ong·gijaniko parakengon, da·ona kingkingba iana ma·mong sorkarini name aganchakaniko on·na man·kujaenganio anga suk ong·ja ine HSPDP dolni dilgipa aro cabinet minister Pa Renikton Lyngdoh Tongkhar mijal Sukrobar salo koborna aganaha.
Da·o gita iako ru·utatangkuode iana ma·mong sorkariko minggipin cholchi su·dodoaniko dakna nangengani gimin a·dok sorkariko didiangan baksa ma·mong sorkariko jetjetangna minggipin cholrang dongode iani gimin agangrikna cholko on·china gita anga MDA coordination committee-na agan-ku·pattiangna sikgen, ineba Tongkhar agandapaha.
ILP-na dabienganiko ra·chaken MDA sorkariba iako agangrikenga ine talatengon, “Chingin apsan kam ka·rimenggipa sorkari iako ra·chakate uamango bil donga kakketde kamko ka·ataha, jenan uamangko matnangnade man·jawaha maina chanchirimaona ra·bagipako ra·chakange chinga gimikni iako a·doko ra·gatna nangnikpaenganikoba mesokaha, ine HSPDP ni dilgipa agankuaha.
Indake ong·engon, ma·mongni Home minister Pa Amit Shah-ni changgipino a·dokona salgnina wenbataio a·dokni seokgimin dilgiparang baksa agan-golpogrikna ua cholko ra·naba gnang ine minister an·tangni ka·dongsoenganiko parakan baksa, ianpakde a·dokni nangnikenggipa ILP-ni gimin unbaksa rongtale agangrikna cholko man·gen ine anga ka·dongsoenga ine ua janapataha.
“ILP-ni gimin ma·mongni chanchienganiko chinga u·ija indiba ILP, Meghalaya-na nama ong·ja ine Governor-ni aganako chinga knarikaha, indiba Pa Amit Shah iako cheke niangkuenga aro iani gimin agangrikna nangnikenga ine janapanio chinga uni giminde agana man·kuja. Ia niamara a·dokna namgen ba namjawa uko uamangni u·ienganiko chinga aganna man·ja maina chingade ia niam a·dokna namgipaan ong·a ine u·ia ine Tongkhar, sing·anina aganchakaha.
Minggipin, ILP-ko a·doko ra·gatanganichi gipinchini manderang a·dokona biapni nitoanirangko nina-nikna nangnike re·baanio uamangna neng·nikanirang donggnikode nikatjaienga ine janapengon, ILP-ko ra·gatgenchimoba tourist-rangni a·dokona re·baanio mamingchiba neng·nikataniko on·jana gita niamko dakani gimin chinga cholko sandianggen ine Tongkhar agandapaha.
Gipinchini re·bae songdongegiparangni a·sel a·doko songdongkamgipa manderangko chelchakna gita Meghalaya Residents Safety and Security Act (MRSSA)ko a·dokna nangchongmotengani giminba minister janapatjole, “ILP-ko a·doko ra·gataniko chinga gimikan nangnika indiba ILP-ni gimin agangrikkuenganio, MRSSA-ko a·doko ra·gatanikoba nangenga maina iaba a·dokni manderangna minggpin cholchi chelchakaniko on·na man·gen ine ua agandapataha.
