Tura, Dec 4: Meghalaya a·doko Inner Line Permit (ILP)-ko ra·gatchina dabienggipa dolrang, Sukrobar salni bako a·dokni Governor Satya Pal Malik-ko gronge dakchakanirangko on·china mol·moleahani gimin, da·o adita salrangni gisepon Meghalaya a·dokni Chief Minister Conrad Sangma baksa Delhi-ona re·ange Union Home Minister Amit Shah-ko grongena ku·rachakataha.

Meghalaya a·doko ILP-ko ra·gatchina dabienggipa dingtang dingtang NGO-rangni nangrime bikotgipa Confederation of Meghalaya Social Organisations (CoMSO)-ni u·iatani gitade, da·o antisa antignini gisepon a·dokni Governor Satya Pal Malik, a·dokni Chief Minister baksa New Delhi-ona re·ange Meghalaya a·doko ILP-ko ra·gatani bidingo Union Home Minister Amit Shah-ko gronge agangrikena ku·rachakataha.

Meghalaya a·dokni Governor, da·o December-ni 18 ba 19 tarikrangon New Delhi-ona re·ange Union Home Minister-ko grongenaba gnang ineba CoMSO-ni dilgiparang parakataha.

Meghalaya a·doko ILP-ko ra·gatchina gita dabiengon, MDA sorkarini dilgiparangkosan ong·aigija a·dok gimikni sak 60 MLA-rangkon Delhi-ona re·ange ILP-ni bidingo ku·rang on·china gita CoMSO dabiengachim ine nikna man·a.