United Nations/Geneva, June 1: India a·songo man·chenggipa COVID-19-ni rokomrang, chong·motan B.1.617.1-ko ‘Kappa’ aro B.1.617.2-ko ‘Delta’ ine World Health Organisations (WHO) minge donaha.
UN health agency-oni koborko on·ani gitade, coronavirus-ni ‘Kappa’ aro ‘Delta’ rokomrangko India a·songosa skanggipa man·chengahachim.
Coronavirus jo·ongrangko nambate ma·sina aro manderang chanchirimna man·na gita ia sabisini bimingrangko altubegipa Greek kattarangchi mingaha WHO-ni Dr Maria Van Kerkhove parakataha.
Gipin a·songrangoba COVID-19-ni rokomrangko manderang altubate ma·sina aro chanchirimna man·na gita rokomni kri bimingrangko mingchina gita Geneva-o donggipa health agency didiataha.
Indake ong·engon, UK a·songo man·chenggipa B.1.1.7 rokomko Alpha, South Africa-o man·chenggipa B.1.351 rokomko Beta, Brazil-o man·chenggipa P.1 rokomko Gamma aro P.2 rokomko Zeta ine mingskagen ine official-rang u·iataha.
US a·songo man·chenggipa COVID-19-ni rokomrangko Epilson aro Iota ine mingskaenga.
India a·songo man·chenggipa B.1.617 COVID-ni rokomko media-rango ‘Indian Variant’ ine mingahani gimin May 12 tariko India a·songni health ministry jegalatenba, ian maming pangchakani gri biming mingani gita ong·enga ine parakatahachim.
Skanggipa COVID-19-ko China a·songni Wuhan songjinmao 2019 bilsini bon·angachibara man·chengahachim aro untalan ia sabisi a·gilsak gimikona giproroangahachim.
Ia coronavirus-ko US a·songni gitcham President Donald Trump, ‘China virus’ ine mingahani gimin China a·song namnikgijaniko mesokskaahachim.
Johns Hopkins University-ni parakani gitade, da·o dipet a·gilsak gimiko sak 170,585,200 manderang ia COVID-19-ko man·aha aro sak 3,546,900-na baten ia COVID-19-ni a·sel siangahachim.
Mongolbar salo India a·song gimiko sak 1,27,510 manderang COVID-19-ko man·dapaha aro ian sal 54-ni gisepo komibatgipa ong·skaaha.
Union Health Ministry-ni u·iatani gitade, da·o dipet India a·song gimiko COVID-19 man·giparang gimik sak 2,81,75,044 gapskaengaha aro sianggiparangara gimik 3,31,895 gapskaengaha.
