Shillong, Feb 22: Budbar salo, Indian National Congress (INC)-ni dilgipa Rahul Gandhi, Meghalaya a•dokona re•baenba, Congress dolni candidate-rangko gronge, Shillong songjinmani Madan Malki-o a•dokni manderangna aganprakangaha.
Ia tom•bimonganio Gandhi baksana, Meghalaya Assembly election-o susaenggipa Congress dolni candidate-rang, chong•motan Vincent Pala, P. N Syiem, Ronnie V Lyngdoh, Manuel Badwar, J. A Lyngdoh aro gipinrangba dongpae bak ra•angtokaha.
Ia tom•bimonganio All India Congress Committee (AICC)-ni gitcham president Rahul Gandhi, jinmana aganprakangengon, batanggimin bilsi bongani gisepo, a•dokni manderangna ku•rachakanirangko chu•sokate on•na man•jaha ine BJP aro NPP-chi dilgipa sorkariko matnangataha.
Meghalaya a•doko namroro silroroaniko ra•bana aro manderangna kam ka•e cha•ani cholrangko bikote on•na Congress dol miksongenga ineba Gandhi aganaha.
BJP aro RSS dolrang, salgro salaram jolo donggipa dingtang dingtang jatni daka rikanirangko aro bebera•anirangko gimaatna miksongenga ineba Gandhi, ia tom•anio mikrakataniko on•angaha.
Trinamool Congress (TMC) dolni kosako matnange aganangskaengon, West Bengal a•doko TMC-ni a•selan dakgrik dinggrikanirang bon•changjaenga aro Goa a•dokonaba uamang (TMC), BJP-na chakpaaniko on•na gitasa re•angaha ine Gandhi parakatenba, Meghalaya a•dokoba ia miksonganiosa TMC susaenga ine mikrakataniko on•angaha.
Meghalaya Assembly election-na Congress dolni manifesto ba ku•rachakanirangkoba ia tom•anio Gandhi gisik ra•attaianiko on•angaha aro a•dokni manderang Congress-ko seoke sorkari rikna chol on•ahaon ia ku•rachakanirangko chu•sokate mesokgen ine parakataha.
