Jowai, Nov 19: Bangladesh a•song baksa kachapgipa simako fencing kana gita Jaintia Hills Autonomous District Council (JHADC) NOC-ko on•aha ine Sukrobar salo JHADC-ni CEM Thombor Shiwat parakataha.
Jaintia Hills a•jao donggipa Indo-Bangla simako fencing kana gita JHADC, NOC-ko on•ahama ine War Central-ni Opposition MDC Holando Lamin-ni sing•anina JHADC-ni CEM, ia kattarangko aganchakaha.
Ia sima arini bidingo JHADC aro Coordination Committee-ni joint inspection-ko dake report-ko on•anio pangchakesa NOC-ko on•na gita Executive Committee tik ka•aha ineba Thombor Shiwat parakataha.
Indake ong•engon, ia jolrango songdongenggipa bang•bata nokdangrangan gama ge•anio pangchake janggi tangpaenggiparangsa ong•achim aro ia biapo fencing-ko kana NOC-ko on•ahani a•sel ia jolrango songdongenggipa manderang, komibeoba 6000-oni 8000 acre-rangona a•arangko Bangladesh a•songchipakna gimaatna nange bang•a noksan ong•atako man•tokna nanggnok ine War Central-ni MDC Holando Lamin parakatskaaha.
Iani bidingo aganchakaniko on•angskaengon, West Jaintia Hills-ona agrede Meghalaya a•dokni bang•bata biaprangon sima kamanahani gimin changni chang sorkarini u•iataniko man•soe JHADC-ba NOC-ko on•na gita nangaha ine JHADC-ni CEM parakataha.
Sorkarini changni chang u•iataniko man•soani giminsa NOC-ko on•aha ine CEM-ni aganchakgipa kattarangni bidingo janapatskaengon, ia simarangko kana gita NOC on•aniko den•galpile, maming ja•kurangko de•na skangba songni nokni dilgiparang aro dingtang dingtang dolrang baksa agangrikchengchina gita Holando Lamin, JHADC-ko didiangaha.
