Shillong, Aug 20: Inquiry-ko dakdilanio Meghalaya Human Rights Commission (MHRC)-ni chairperson-ko champengani maming niamrang dongja ine Sukrobar salo, Meghalaya a•dokni Chief Minister Conrad K Sangma parakataha.
Manderangko so•otanio MHRC-an inquiry-ko dakgipa dol ong•ani gimin HNLC-ni gitcham dilgipa Cheristerfield Thangkhiew-ko police-rangni so•otani bidingo inquiry-ko dilna gita MHRC-ni chairperson-ko seokaniara indinsa ong•gramenga ine Opposition dolni dilgipa Mukul Sangma, MDA sorkariko matnangahachim.
Indake ong•engon, Mukul Sangma-ni agangipa kattarangko Chief Minister jegalatskaenba, inquiry-ko dakdilanio MHRC-ni chairperson-ko champengna dongimin niamrang dongja ine talataniko on•angskaaha.
Chief Minister-ni talatani gitade, ia a•selni bidingo MHRC, mandena on•gimin bilo pangchake am•sandianggen indiba ia a•selko Commission of Enquiry Act-ni dongimin niamo pangchake judicial inquiry-ko dakchina sorkari ge•etahani gimin ian am•sandiani kamrangko bilakbatatgen.
Inquiry-ko dakdilna gita MHRC-ni chairperson-na bilko on•manahani gimin ia a•selko am•sandianio ua mandena on•gimin bilrango pangchake aro gipin niamrango pangchakeba am•sandianiko dakna siengani gimin ia inquiry-ko dakanichi bang•a namgnirang donggen ineba Chief Minister parakataha.
