Shillong, March 8: A·gilsak gimik bi·ani salchi pangchakaniko mangrake rikenga aro a·gilsak gimiko me·chikrangni salko manianio me·chikrangni dilgipa ong·ani COVID-19-ni chasongo mikkangchi apsan gadango chu·sokenga” ine pangchakaniko donenba International Women’s Day ba Me·chikrangni salko a·gilsak gimiko maniani bak gita mija Sonibar salo Shillong, Bivar Road-o donggipa YWCA-ni Fair Haven Hall-o Young women’s Christian Association-chi World Day of Prayer cum International Women’s Day-ko ong·ate maniangaha.
International Women’s Day, 2021-ko Sonibar salo salsa skang maniangani bak gita, World Day of Prayer cum International Women’s Day-ko YWCA-o ong·atanggipao, Reverend B. R. Sohkia, Dr. Valencia Myrboh aro gipin niksenggipa manderang baksana YWCA-ni hostel-o donggipa chatrirang gimikan bakko ra·angtokaha. An·tangtango pangchakna, ka·donggipa aro bilakgipa ong·na nangani gimin miksonganiko done ia programko ong·ataha.
Tom·ao mongsonggipa sokgipa ong·e salni bako bom·bagiparangna aganprakanganio, rongtalgipa sastroni kattako poraiatenba, songsalo aro ia a·gilsako gimiknan somoi donga, aro ia somoio an·chingni songsalo aro a·jao, a·songo aro a·songgipino me·chik dilgiparangko nangchongmotenga ine Reverend B. R. Sohkia agan-parakataha.
Da·ororo an·chingni mikrontangchi nikenggipa pilakchin ong·enggipa dingtang dingtang obostarangni bidingo an·ching ku·rangrangko on·na nangenga. Ia pilak ong·enganirangara ong·gijagipa ramaona sokangenga ine beben manderang iako ma·sigenchimoba iani gimin mamingkoba agangija aro ku·rang on·gija jrip-mittip dongna nangniktoka. Uni gimin, da·ororo ding·chaoenggipa obostarangni bidingo sakantikon, mongsongbate me·chikrangko gimik ku·cholsan ong·e gisik-ka·tong gimikchi ku·rangrangko on·tokchina gita chinga didianiko on·na nangnika ine Reverend B. R. Sohkia, tom·ao aganprakangjolaha.
