Tura, May 17: Garo Hills Autonomous District Council (GHADC)-o kam ka•enggipa manderangna jabongani dormahako gital executive committee, gitcham pay scale-o on•na ku•rachakahaoba ia jabongani dormaharangko ra•na jechaktokengani gimin GHADC-o kajinarangko chimonge tangka paisarangko man•piltaina gita jabonganiko dormahako ra•chake, jingjengataniko dontongchina aro kamtangtangko ka•piltaichina Tura-ni MP Agatha K Sangma, GHADC-o kam ka•giparangko mol•molataha.
GHADC-o kam ka•enggiparang, bilsi gittam ong•na sipile an•tangtangni dormaharangko man•tokkujaengani gimin batanggimin jarangonin kamrangko ka•gija jingjengattokengani a•sel GHADC-o pilak kamrangan ja•donggaatako man•na nangengahachim aro kajinarangko chimongna man•jae tangka paisani gita neng•nikanirangko chagrongna nangengahachim.
Indake ong•engon, GHADC-o kam ka•giparang, kamtangtangko ka•gija jingjengatengani a•sel ramram manderangba neng•nikanirangko chagrongna nangengaha aro da•o gita sabisi giproroengmiting somoio iandake jingjengataniara pilakni gitan neng•nikaniko ra•baanisan ong•enga ine Tura-ni MP parakatenba, executive committee-ni on•enggipa jabongani dormahako ra•chake kamtangtangko ka•piltaichina GHADC-ni Non-Gazetted Employees Association (NGEA)-ko didiataha.
“Indita jarangni dormaharangko man•jae neng•nikanirangko chagrongna nangengani gimin angaba na•simang baksa dukko man•paa. Indiba ia somoirango an•chingni Meghalaya a•dokoba sabisi ta•raken giproroengani gimin neng•nikanirangko man•enggipa nokdangrangna chanchie ia jabongani dormahako ra•chakchina aro kamtangtangko ka•piltaichina anga mol•molenga,” ine Sangma, NGEA-na seatgipa chittio parakataha.
Iani bidingo ua GHADC-ni CEM aro a•dokni Chief Minister baksa agangrikmanaha aro mikkangchi GHADC-o kam ka•giparangni dormaharangko on•na man•na gita ua GHADC-ni executive committee aro a•dokni Cabinet baksa agangrikangkugen ineba Agatha ku•rachakaniko on•angaha.
