Tura, Oct 26: Meghalaya sorkarini, SSA skulo skigiparangna chu·gimik jabrini betonrangko on·kujaengani gimin, A·chik a·song gimikoni pilak skigiparangni nangrimgimin All Garo Hills SSA School Teachers Association (AGHSSASTA) dol, East Garo Hills, Williamnagar-ni Rongrenggre Government Higher Secondary School ni kalchakram-oni DC office-ona jinma re·jome jegalaniko Mongolbar salo ong·atangaha.
Jinma re·jomaniko ong·atani somoio uamangni dabianirang baksa a·jani Deputy Commissioner-ni jak gita ma·mongni education minister Pa Dharmendra Pradhan-na memorandum-koba on·angaha.
Ia rally-o Garo Hills-ni dingtang dingtang a·jarangoni SSA skigiparang gimikan bakko ra·angtokaha.
Memorandum-ko on·ani bidingo All Garo Hills SSA School Teachers Association -ni padot Lavingstone G. Momin-o Hubnews-ni sing·roke nianiko dakangon, ma·mong sorkarini SSA-ni tangkarangko watatkujaengani gimin a·dok sorkari, skigiparangna jabrini betonrangko on·na man·kujaenga ine a·dokni education minister aro skotong minister chingna aganaha aro indita ru·utani ja·manba tangkarangko on·atkujaenga, inani gimin ma·mongni minister-na chinga da·alo memorandum-ko on·ataha ine aganchakangaha. Unbaksana, uamangni dabienggipako chu·sokatjaode uamang a·songni skotong songjinma New Delhi-ni Jantar Mantar-ona re·ange jingjengataniko dakangkugen ineba ua janapataha.
SSA-o skigiparangni dabianiko sorkari knachakjaode skul ka·aniko dontongatgen ingipani gimin sing·on, oe, chingni kamtangko chinga dontongatna nangaigen, porikka ra·anikoba dontongatna nangaigen maina indita chel·bea ramako re·rurae kamtangko ka·nade chingaba oktangna gapataniko nangchongmota aro training-ona re·angnamangba rama korosna chingna tangka-paisako nanga uni gimin chinga training-chiba re·angna man·chongmotjawaha ine association-ni padot Lavingstone G. Momin agandapataha.
