Shillong, July 9: West Jaintia Hills district-ni ning·o donggipa Laskhein-ko C&RD Block-oniko Sub Division-ona ra·doatchina dabianirang baksa Mowkaiaw constituency-ni MLA Nujorki Sungoh aro MDC Winning G Sungoh, songni nokmarang baksana Joint Action Committee (JAC), a·dokni skotong minister Pa Conrad K. Sangma-ko Sukrobar salo grongangtokaha.
Iani bidingo JAC-ni janapatani gita, biapni apalani aro mande jelanio pangchake aro ru·uta bilsirangonin Mowkaiaw constituency-ni ning·o donggipa songni manderangni iako chu·sokatna nangnikbaenggipa ong·ani gimin Laskein C&RD Block-ko Civil Sub Division-ona ra·doatna gita krachongmotaha.
Indake ong·engon, uamangni dabianirang baksa JAC-ni grongeaniko skotong minister chu·ongnikenba Laskein C&RD Block-oniko Civil Sub Division-ona ra·doatani bidingo talbate chekangkuna gita uamangna aganataha.
