Williamnagar, March 7: Re·angggipa February 25 tariko East Garo Hills a·jani Dorengkigre song jolo donggipa Jadi dareo ga·ake a·sel ong·anio sianggipa saksa chadambeni manggisiko niamko ja·rikgija skatang photo-rangko aro vide-rangko Social Media aro Youtube-rangko watdoatenba mesokataniko gong·raken ra·galchina gita nokdangni manderang koborna u·iatan baksa Mongolbar salo mol·molataniko on·angaha.
Koborko man·soani gitade, Williamnagar, PHE Colony-oni Pa Salseng M Sangma-ni depante saksa bilsi 22 ong·gipa Wagera R Marak, unsalo Jadi dareko nina re·angmiting somoio rasong gribee ka·machina ga·akonangani ja·man siaha aro ua apsan salon a·jani police dolni sokbana skangan manderang uni manggisiko ra·dosotokenba ja·mano manggisiko 108 ambulance-o gate Williamnagar-china ra·angaha.
Indake ong·engon, a·sel ong·mitingo manderangni jachipchange ra·anirangko nikani gimin sianggipani noksarangko Youtube aro Facebook-rango watdoatpajachina gita mol·molahaoba manderangni manijani gimin nokdangni manderang suk ong·gijaniko parakatenba, gong·raken uarangko ra·galpilchina gita nokdangni manderang mol·molanikoba on·atjolaha.
