Shillong, Nov 09: Man·gnigipa betonrangko on·china gita changni-chang a·dok sorkario mol·mole dabigenchimoba, da·alona kingking knachakkujaengani gimin da·o jadokmang ong·pilenggipani betonrangko on·china gita da·bie a·dokni gimik dam 11 district-rangoni pilak SSA skulo skigiparang gimikni toprimgimin Meghalaya Sarva Shiksha Abhiyan (SSA) Schools Association, changsatai MDA sorkarini kosako jegale jingjengataniko Mongolbar salo daktaina draatako man·angaha.
Poraienggipa bi·sarangni mikkangchi dal·rorognina ding·ol-kramchie aro gisik neng·e skie on·enggiparangni man·gnigipa betonrangko sorkarini da·onaba on·kujaengani a·selo a·dok gimikoni SSA-o skigiparang da·o gittamgipa changna kingking iandakgipa obostako chagrongtaina nangao ga·akaha.
Skigiparangni man·gni betonrangko re·anggipa June, July, August, September, October aro ia November jarangniko sorkari on·kujaengachim ine nikatna man·gen.
Indake ong·engon, Mongolbar salo tom·tom re·jome jingjengatanio district gimikchini sak hajalrangna baten skigiparang bakko ra·e uamangni neng·nikanirang baksa ku·rangrangko on·angtokaha. Re·jomaniko, Shillong, Jaiaw-ni Lum Jingthangbriew-oni a·bachengate Jaiaw-ni Students field-o matchotateaha aro ia jingjengatanio a·dokni dingtang dingtang pressure group-rang jekai HITO, HYC aro gipin organisation-rangba bakko ra·e SSA-o skigiparangna chakpae ku·rangko on·angpaaha.
Indita jani betonrangko a·dok sorkarini on·kujaengani gimin adita sak skigiparang uamangni neng·nikanirangko janape salni bako tom·bagipa jinmaoba aganangtokaha.
