Shillong, Nov 8: Jaintia Hills a•jani skigipa Trinity Saioo-na Sombar salo, Padma Shri upattiko, India a•songni President Ram Nath Kovind-ni jakchi Raj Bhavan-o on•angaha.
Trinity Saioo, 1972 bilsi December 1 tariko atchiahachim aro ia Padma Shri upattiko una, a•gilsak gimikon mingsingenggipa Lakadong holdi-ko ge•na gita game ge•e cha•enggiparangoni sak 800-mangko self help group (SHG)-rangko kulina didina man•ahani gimin Sombar salo on•aha.
Koborko on•ani gitade, ua Spice Board of India-ni dakchakaniko ra•enba, Mulieh songni game ge•e cha•giparangko SHG-rangko bikotchina didie, bang•a namgnirangko ra•bae on•na man•aha. Ia sak 800 game ge•e cha•enggipa manderang baksa ua Ieng Skhem Spice Society-ko a•bachengataha aro Laskein C&RD Block-ni SHG-rang baksaba nangrime kamko ka•aha.
Iana skang, uni iandakgipa namgipa kamrangna 2018 bilsini October 15 tarikoba Saioo-na Union Agriculture Ministry-ni gita New Delhi-o Mahila Kisan Diwas-ko manianio mande ra•pilskaaniko dakangahachim.
