Shillong, Sep 27: Mongolbar salo, Meghalaya a•dokni Chief Secretary DP Wahlang, West Jaintia Hills a•jani official-rang baksa Deputy Commissioner-ni office-o tom•aniko ong•atangenba, samtangtango ong•telaigiparangko chel•chakna National Green Tribunal (NGT)-ni on•gimin niamrangko rake ja•rikchina ge•etaniko on•angaha.
Ia tom•anio Urban Affairs-ni Commissioner & Secretary MR Synrem, Urban Affairs-ni Director E Kharmalki, West Jaintia Hills a•jani Deputy Commissioner BS Sohliya, Forest-ni Principal Chief Conservator aro MSPCB-ni Chairman RS Gill aro gipin officer-rangba dongpae bak ra•angaha.
Ia tom•anio a•dokni Chief Secretary, West Jaintia Hills a•jani officer-rang baksa chanchirimengon, Myntdu chibimako rongtale rakkianio NGT-ni dongimin niamrangko rake ja•rikchina, Jowai-o jabol galchakani biapko ta•raken sandichina aro Myntdu chibimaoni metre 50-ni ning•o rikgipa nokrangko ra•gale galchina gita West Jaintia Hills District Administration, Jowai Municipal Board aro Urban Affairs department-ko didiangaha.
