Longewala, Nov 15: India-ko bobil dakgiparangna su·dikeani kattako agananganio, ong·gija kamko ka·anio jakskangode “prachand jawab” ba bilaken una aganchakaniko on·angkagen ine a·songni Prime Minister Pa Narendra Modi, uni kamko jako ra·chakataoni intal batanggimin 2014 bilsioni dakrongbaenga gita a·songko chelchakgipa sipairang baksa ia bilsini Diwali-ko manirimna mni Sonibar salo Longewala Post-china wenangani somaio aganaha.
Batanggimin 1971 bilsi jolo Pakistan-ni sipairangni bang·a chadrapanirango, a·songni sipairangni warachake uarangko chu·sokgija ong·atani ja·man mingsinggipa sipairangni bak-rengi ong·bagipa forward post-o sipai kotokrangna aganprakanio, a·songni biap ba a·jako bariatani bilrangan a·gilsakko namen so·so-jengjeng ong·ata aro indakgipa kamrangchin 18-gipa chasongoni dongbaenggipana gisiko namen dongsikaniko mesokani gitaba ong·enga ine Pa Modi, biming minggija songsul a·song China-ko jaksi otaha.
Indake a·jako bariatani bilrangni kosako India-ba bilakgipa silchidare gita ong·skaaha ine ua iano Pakistan-ko dingtangmancha miksonge aganenba, songsul a·songo bobil dolrangni a·tiprangko surgical strike ka·ani aro dakgrikani sildorengchi chadrapanirangko miksongeming, uamangni nokonikon bobil dolrangna dakchakgipako India-ni sipairang bon·ataha ine Modi agandapaha.
“An·chingni sima-arirangko an·pachake nitimenggipa an·chingni ka·donggipa sipairangni warachakaniko a·gilsakni darang bilchiba champengna man·jawa … An·chingni man·gniko on·tisani gitaba watpakjawa ine da·alo a·gilsakan ma·siaha,” ine ua iano Ladakh sima-ario a·song damgnini sipairangni rakgrike donganiko miksonge aganaha. India, da·alo gipinrangna ma·sichakani aro uamangko ma·sichakatani policy-o bebera·a, indiba iako dake nigenchimode, una bilake warachakaniko on·angskagen ine ua mikrakataniko on·aha.
A·songko ra·biengiparangna tik ong·gipa aganchakaniko on·skana gita a·songo chu·ongen bilrang gnang baksana politicalni gitaba sikanirang gnang, ua aganaha.
An·tangtango chu·onga gita bilrang donganio gamchataniko ma·eke agananio, international baksa nangrimanirang aro uamang baksa apsananirango an·ching namgipa gadango ong·genchimoba, mikrake nitimanian chelchakanina rama ong·a, mikrake donganian kusinirangko ra·baani chol ong·a aro tom·tomanian bil gnangani boksis ong·a ine Prime minister aganaha.
“A·gilsak gimikni ma·ambian an·chingna mesokenga, je napdrabagiparangni kosako warachakna amgipa aro bil gnanggiparangsan naljokgipa aro tang·dogimin a·songrang ong·kame donga,” ine agane, India-ni kror 130 manderang a·songko chelchakgipa sipairang baksaan ong·paa aro uamangni ka·donggipa kamrangna sakantian skorangko choknoka ine ua agandapaha.
“Na·simangni matgrik ong·ani gunrangna pilakan rasong chaa,” ine ua sipairangna aganaha, jean a·gisirangoba, buringoba ba tu·begipa sagalomangba, gimik dakgipa obostaon uamangni ka·donggipa kamrang nambataha ine agandapaha.
A·songni sipairangni sambao ong·osa uni bilsianti Diwali-ko maniade chu·sokgipa ong·ronga ine aganenba, ia maniani somaio mandetangrangoni chel·tange ua dongna man·chongmotja aro sipairang baksa baditana kingking somairangko re·atna man·a, inditan a·songko chel·chakna aro dangdike on·na gita ua ka·dongbataniko man·a ineba Modi agandapaha.
Janapna gita, 1971 bilsio India-ni Pakistan-ko dakgrike amatani a·sel songsul a·song Bangladesh jakgitelko man·aha. Modi, Diwali-ko maniani somai changantin a·songni sipairang baksa apsan manirimpana gita forward posts-chi wenangronga.
