Shillong, Nov 4: Jal Jeevan Mission (JJM)-ni kamko ka•anio chu•sokgipa ong•engani gimin Union Jal Shakti Minister Gajendra Singh Shekhawat, Meghalaya a•dokko mittelpilangaha.
JJM-ni ning•o chi pipe-rangko sale on•ani da•o dipet a•songni gita chu•sokani 36 percent ong•engon, Meghalaya a•dokode 41.5 percent ong•skae, 5.5 percent-chi batengachim.
JJM-ni ning•o Meghalaya a•doko donggipa nokdangrangna chi pipe-rangko sale on•anio ta•rakbatengani gimin mittelpilangengon, ia scheme-ko a•bachengatani somoio a•dokni songadam nokadamrango chi pipe-rangko soke man•gipa nokdangrang, 1 percent-ba ong•jachim indiba ia scheme-ko ra•gatani ja•man Meghalaya a•doko bang•bata nokdangrangan chi pipe-rangko noktangtango man•tokaha ine Union Minister parakataha.
Bristibar salo ua, ma•mong sorkarini ra•gatgipa Jal Jeevan Mission, Pradhan Mantri Krishi Sinchayee Yojana-Har Kher Ko Pani aro uandakgipa scheme-rangni kamrangko nipilna gita tom•aniko ong•atanio dongpae bakko ra•angahachim.
Meghalaya a•doko chiring chibisikrangko tangatpilna gita dingtang dingtang project-rangko ra•gatengani giminba ua a•dok sorkariko mittelpilangaha. Ia project-rango chu•sokgipa ong•aniara gipin a•dokrangna dakmesokani ong•gen ineba Union Minister aganaha.
