Shillong, July 27: Chasong damberangni mikkangchi janggi tanganio uamangna kragipa kamrangko basee ra·anio bilsi dambeoni agan-ku·pattianirangchi dakchakanirangko on·na miksonge a·dokni skotong minister Pa Conrad K Sangma, Mongolbar salo video conference gita Mere Mentor – an Edu Tech venture-ko a·doko a·bachengate on·angaha.

Iako a·bachengate on·ao skotong minister-ni agananganio, high school ba higher secondary school-rangko matchotna skangan bi·sarangni skulo poraimitingon mikkangchi janggi tangani gimin cholko basee ra·anio uamangna namgipa agan-ku·pattianirangko on·na gita nangchongmotgipa ong·a.

“Ru·utgija salrangna skang, Meghalaya a·doko chinga Youth Policy-ko a·bachengate on·angaha aro ian a·songni je a·doknaba namen gamchatgipa ong·a maina an·chingni a·songo chadamberang namen jelbra-jelsua aro chasong damberangko mikkangchina tarisoanichi a·songni aroba a·dokni chu·sokani ba chu·sokgijaniko ra·bana gita ama ine aganenba, a·songko dingtangatna bil gnanggipa chasong damberangko bimang ong·ate uamangna namgipa ramarangko mesoke on·ode an·ching changsaode a·gilsak gimiko niksengbatgipao ong·na gita man·gen,” ine skotong minister aganangaha.

Janggi tangani cholko basee ra·anio uamangna namchachamiting somoion dakchakaniko on·na gita nanga ine janapatan baksa, dambeoni indakgipa agan-ku·pattianirangko on·enganina Mere Mentor-koba ua de·mittele aganangaha.

“Mere Mentor” -ara baditaba bilsirangna sandirikkite nieming Mentor team aro iako a·bachengatgipa Saurav K Singha-maangni ning·tue chanchininge kamrangko ka·baani bitesa ong·a. Iako a·bachengate on·ani miksonganian A·songni gadangko mikkangchi tang·doatna man·gnigipa India a·songni chadamberangni janggi tanganiko dingtangatna gita ong·a.