Tura, June 13: North Garo Hills a•jani Chisim Apal jolni chadamberangna aro NGO-ni dilgiparang Jekai Dainadubi Circle Youth Organization (DCYO) aro A•chik Indigenous Justice Initiative Forum (AIJIF) baksa bakrime Ja•ripbonchi Livelihood Society-ni gita re•anggipa 11th/July/2022 salo dingtang dingtang scheme-rangni bidingo talate on•na gita awareness program-ko Chisim Apal Community Hall-o ong•atangaha.
Ia awareness program-ko ong•atanio Ja•ripbonchi Livelihood Society-ni Director Te Digros D Shira, mongsonggipa ong•e aganskie talataniko dakdilangaha, uni jinmana aganprakengon, kamgri ong•e dongenggipa chadamberangna janggi tangani cholrangko on•na miksonganio ia scheme-rangni bidingo talate on•na gita ia program-ko ong•ataha ine parakangaha. Ia program-ko ong•ate jolni chadamberangna dakchakani kamrangko NGO-rang baksa ku•monge dakdilangen ineba ua parakangaha.
Ia program-ko ong•atanio Loan, Health, Insurance, Agriculture, Food Processing, Tourism aro Skills Development-ni bidingo man•chape dingtang dingtang scheme-rangni bidingo agan-talate on•angaha. Te Digros Shira-ni aganani gitade mongsongbate mikkangchi chadamberang dingtang dingtang Loan rangko ra•chengna skangba training-rangko ra•chengani cholko dakchengna nangenga, jedakode pilak kamon chu•sokna dakchakbeani ong•gen. Unbaksana Dainadubi, Chisim Apal, Damas songrangara Garo Hills-ni National Highway-ni cholgugao ong•gipa biaprang ong•ani gimin Food Processing Unit ba Farmers Producer Company-rangkoba ia areana nangchongmotengaha, uni gimin ia kamrangko a•bachengatna cholrangko sandie mikkangchi kam ka•gen ineba Te Digros parakangaha.
