Imphal, May 30: Batanggimin May 3 tarikoni a·bachenge, Manipur a·doko songdongenggipa jatrangni gisepo kajia-golmal aro so·so-jengjeng ong·angani mamlako mikkangchina nambate ja·kurangko de·enba kamko ka·angna man·na gita, iani bidingo ning·tue agan-golporimna ma·mongni Home minister Pa Amit Shah, Sombar walo Manipur a·dokona re·baaha.

Manipur-ona sokearin, a·dokni skotong minister Pa N Biren Singh-chi dilenggipa council of minister-rang baksa home minister Pa Amit Shah, a·doko ong·enggipa so·so-jengjengni bidingo tom·e chanchidilangaha.

Koborko man·soengani gitade, Indo-Myanmar sima-ari jolrangko man·chape, dingtang dingtang jatrangni brine songdongenggipa district ba a·jarangchina wenjolange Pa Amit Shah nirokeaniko dakangnaba gnang.

Indake ong·engon, a·doko da·o ong·enggipa obostani bidingo mija Sombar salo, Union minister of State for Home Pa Nityanand Rai aro gipin officer-rang baksa a·dokni skotong minister chu·gimik obostarangni gimin nipiltaianiko dakangahachim.

Re·anggipa May 3 tarikoni a·bachenggipa golmalrangni ja·man, gimik dam 16 district-rangoni dam 11 -rango aro Imphal East aro Imphal West -rangko man·chape curfew-ko apsandaken ra·gatangkuaha. Unbaksana, Army, Central Paramilitary sipairang, Manipur police commando-rang baksana Rapid Action Force-ni sipairangba, Imphal valley aro uni sampeng-ketchio donggipa a·jarango nangrime nirok-simsakatanirangko dakangkuenga ineba koborna parakataha.