Guwahati, July 28: Ansarullah Bangla Team (ABT)-ni mande saksa, jekon Jehadi-o jak dongna nanga ine chanchichipengachim, Assam-ni police-rang, uni nokoniko rim•na man•aha.
Rim•ako man•gipa mandeara Assam Goalpara a•jao donggipa Pakhiura songni Abbas Ali minggipa mande ong•achim.
Police official-rangni u•iatani gitade, rim•ako man•gipa Abbas Ali-ara, Bangladesh a•songni Jehadi aro ABT-ni mongsonggipa membor Mehboob-na uni December jao Assam-ona re•baani somoio pilak nanga dakchakanirangko on•gipa mandeba ong•achim.
Iani bidingo kobor ra•timgiparangna talataniko on•angengon, ABT aro Al-Qaeda bobil dolrango jak donggipa bang•a manderangkon Assam-osan ong•aigija Bangalore aro Bengal-onikoba rim•na man•aha ine DGP Bhaskar Jyoti Mahanta parakataha.
