By Nora Sangma
An∙ching plakan re∙anggipa sal somoi rangni obostako knaengenok ine anga bebe ra∙a. A∙dokni skotong Shillong jillao so•sojengjeng ong∙enganichi bangbata songdongengipa manderangna namen neng•nikaniko sokataha. Ia manderangko an∙chi dingchaoataniara HNLC ni dilgipa gitcham Pa Cheristerfield Thangkiew ko Police rangni goe galani a∙selo ong∙aha aro public ni agananigitade uko arrest ka∙e singsandianiko dakchengna nangachim ine aganangaha. Constitution ni Article 21 (Right to Life) o pangchake mandeko rangsan goe galani ong∙ja ine uamang raken parakangaha.
Ia obostako name dake niatgenchimode Home (Police) Department ni changjani a∙sel ba ong∙aha ine nikna man∙a maina re∙anggipa sal somoi rango dingtang dingtang dakgipa obosta rango darang mandekoba name singsandigijade rangsan goe gala ingipako nikbreja. Resign ka∙angipa Home Minister Lahkmen Rymbui ba iani bidingo mamingkon ma∙sija inesa aganangaha. Ia bini aganengipa katta ko ra∙chakna man∙genma kragipa ong•ja ine an•ching pilakan u•ia. Saksa Home Minister ong∙e ong∙gimin obosta ni bidingo mamingkon ma∙sija ine agananide Minister ni gisik nangijako mesoka!
Home Ministerni portfolio gesa gamchatbegipa aro simsakna nangbatgipa daito ong∙a maina je dakgipa ken∙gnigipa aro niam gri dakgipa kam rangoni naljokatnagipa home Minister-ni kaman ong∙a. An∙ching nipilatgenchim ongode re∙anggipa somoi rango UDP Party ni gipin Party rangni kosako matnange chokki ko an∙tangtangna ra∙sekna jotton ka∙a koba nikna man∙bea. Home Department san ong∙aigija dingtang dingtang Department ni kosako matnangkoba nikna man∙a.
Da∙o jensalo Party tangni dilgipan Home Departmentko jako ra∙e kam ka∙genchimoba a∙dokna batesa golmal rangko sokatenga. Ian uamangni dilna changijako mesoka gaakenga. Ia obosta mangmango pangchakgijaba an∙ching gipin a∙sel rangkoba nikna man∙aha jekai koela ko niam gri cho∙e salani UDP Party ni nirokaniko dakon bilongbataha. Gipin Department rang jekai Social Welfare oba merong gimaaniko nikna man∙aha aro gipin gipin obosta rangba bang∙en gnang.
Ia obosta rangko niaton an∙ching UDP ni dilna changgijakoba niknagita man∙enga maina gipin Party kode bilongen jaksi ot•bea indiba an∙tangona kamni bojako chilna nangjokon, katta aganagita kam chide sokdoja. Uamang manderangna an∙tangtangko nambate dilna changa ine mesoknasa matnangani rangko dakrongachima? Ma gamchatbatgipa portfolio rangko an∙tang Party ni dilgiparangna jakepna miksongachima?
“Jeko satmanahachim chon∙kamao ukon ra∙na nang∙en” ingipa katta ming uamangni kam bewal rangko tosusana man∙pila.
