Tura, Jan 21: Jal Jeevan Mission (JJM)-ni kamrangko chu•sokatna dakchakanichi songni nokni manderangna chirangko on•ahani gimin West Garo Hills a•jani Rongram Block ning•o donggipa Ganol A•pal Village Water & Sanitation Committee (VWSC)-ni secretary Lipton Sangma-ko da•o January-ni 26 tariko, a•songni chang 76-gipa Republic Day-ko manianio bak ra•na gita New Delhi-ona okamataha.
Jolo songdongenggipa manderangni u•iatani gitade, JJM-ko ma•mong sorkarini a•bachengatna skang, Ganol A•pal songo chirangko man•jae, songni manderang, mongsongbate me•chikrang, chel•a biaprangonikosa chiko ko•na nange neng•nikanirangko chagrongna nangtokachim indiba JJM-ko a•bachengatani ja•man, Ganol A•pal songoba ia JJM-ni kamrangko chu•sokatenba da•o songni manderang, chel•a biaprangona re•na nanggija noktangtangon chirangko man•engaha.
Ganol A•pal songo JJM-ni kamrangko VWSC-ni president aro secretary-ni dilanichi, nirok sandianirangko dakjringenga aro uandaken banoba chi jakkalsretanirangko nikgenchimode, uarangko noksa ba jawilwat ka•enba, VWSC-ni president ba secretary-na u•iatronga. Iandake kamrangko ka•anichi da•o songni nokni manderang, a•ran karini somoirangoba china dilna gita nangjaha aro pilak somoirangon chirangko nanga gita man•tokengaha ine songni manderang u•iataha.
Iandake songo noko kamrangko ka•dilanichi JJM-ni kamrangko chu•sokgipa ong•atahani gimin VWSC-ni secretary Lipton Sangma-ko a•songni chang 76-gipa Republic Day-ko manianio bak ra•na gita New Delhi-ona okamatenga aro uano ua Union Minister baksa golpogrikna cholkoba man•gen ine kobor on•aha.
Indake ong•engon, JJM-ni kamrangko chu•sokgipa ong•atanichi chirangko on•ahani gimin Ganol A•pal songni manderang, dingtangmancha ma•mong sorkari aro PHE department-koba mittelpilataha.
Na·simang ia video-koba nina man·gen:
Na·simang iakoba poraina man·gen: M’laya Day-ko maniani bak gita gital Secretariat-na pangchakaniko CM songe on•a
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- https://www.instagram.com/ne_media_hub
