Nongpoh, Sept 07: Meghalaya aro Assam a·dok damgnini gisepo kajia-golmal gnanggipa sima-arirangko skanggipa gadango namgrikataniko dakna mikkang-mikkang Hima Jirang aro Hima Nongspung-ni a·ani lekkarangko sriksrik ra·e kata ine Jirang constituency-ni MLA-ni kosako Patharkhmah-ni Sordar-ni matnanganirangko Sur ki Paidbah Western Ri-Bhoi-ni ning·o donggipa dingtang dingtang songrangni Sordar aro Office Syiem Hima Jirang-na seoka man·giparang gimik nangrime uni matnanganio maming pangchakani gri ine jegalattokaha.
Iani bidingo Hima Jirang-ni assistant secretary Langester Wahlang-ni koborna aganatanio, Assam baksa sima-arini golmalko namgrikataniko dakna mikkang-mikkang Jirang constituency-ni MLA, ua jolni Hima-ni ning·ogipa a·ani gimin see rakkianirang aro a·ani lekkarangko sriksrik ra·e kata ine Patharkhmah-ni Sordar, Pa Najim Kharmalki-ni matnanganiko jeataha.
Ian jolni MLA-ko galonna miksonge agananisan ong·aia maina kakketko aganode, jensomoio Hima Jirangni ning·ogipa songrangni a·ani lekkarangko saoba nanga ong·ode Hima-ni dilgiparang tom·atenba iani gimin name segate donanirangko dakronga ineba ua aganataha.
Indake ong·engon, Sur ki Paidbah Western Ri Bhoi-ni bimango nangrimgimin Jirang constituency-ni ning·ogipa dingtang dingtang songrangni Sordar-rang, Western Ri Bhoi Dorbar-ni Adviser Pa Lestar Nongphlang-ko man·chape, Mawskei Them-ni Sordar Pa Siewdor Syngkli, Women Social Welfare Patharkhmah-ni dilgipa Liskonraw Nongtri iamang gimikan Patharkhmah-ni Sordar-ni matnanganirango maming kakketani dongja aro ian an·tangni gita aganaigipa kattarangsa ong·a ine matnangattokaha.
Batanggimin bilsi-bri atani gisepon Jirang assembly constituency-o bang·a namroro-silroroataniko jolni MLA-ni ra·baanirangko nikna man·aha jekon skangni MLA-rang chu·sokate on·na man·chipangjachim ine janapatan baksa joltangni da·o MLA ong·enggipani rake kamko ka·anichi Patharkhmah Administrative Unit da·alo Civil Sub Division-ona ra·doataniko man·na gita a·dok sorkarini gisik on·enganikoba nikna man·a ine uamang janapdapataha.
