Jowai, Dec 06: Mija anti Robibar attamo Jowai-ni Ladthadlaboh-o JHADC-ni Iawthymme Market ba bajar cha·gipa biap paksamsako bon·pile wa·al kamgopani ja·man, Council-ni Executive Member aro bajarni incharge, Evening Star Teron wa·al kamanichi nosto ong·anirangko Sombar salo nirokangaha.
Iani bidingo Teron-ni koborna u·iatani gita, unattamo wa·al kamchichaanichi dokan nok te 42 rangko tapra changpile kamtokaha jeon godown-rang aro na·kamrangko donchakgipa nokko man·chapa.
Ia obostani bidingo Market department-ni officer-rangoniko report-rangko man·ani ja·manosa Council-ni Executive Committee damsan asongenba agan-golpogrikanggen ineba ua u·iatkuaha.
Indake ong·engon, bajarko wa·al kamani ja·pangara dokan nokrang baksa chapchap rikgipa cha dokanonisa kamchakatna nanga ine chanchichipenga ine West Jaintia Hills a·jani Superintendent of Police, Pa Bikram D Marak koborna u·iataha.
