Shillong, July 9: Re·baenggipa July-ni 17 tariko Union Home Minister Amit Shah, Meghalaya a·dokni skotong Shillong songjinmaona re·baenba, salgro salaram a·dok gimikni chief minister-rang baksa tom·e chanchirimanggen.
Meghalaya a·dokni Chief Minister Conrad K Sangma-ni parakatani gitade, Union Home Minister Amit Shah, salgnina a·dokona re·baenga.
“Ua (Shah) salgro salaram a·dok gimikni chief minister-rang baksa tom·gen aro ia tom·anio chief secretary-rang aro director general of police (DGP)-rangba dongpae bak ra·anggen,” ine Sangma parakataha.
Shillong-ona re·baani somoio ua North Eastern Space Application Centre (NESAC) baksaba tom·gen aro East Khasi Hills a·jani adita project-rangko a·bachengate on·angjolgen ineba Chief Minister parakataha.
“Union Home Minister, Sohra-onaba re·ange ua biapo project mingsako a·bachengatgen aro Sohra-o bol ge·anirangko bariatengani gimin ia bol ge·anikoba ua a·bachengate on·anggen,” ine Sangma aganaha.
Meghalaya a·doko Inner Line Permit (ILP)-ko ra·gatchina dabienggipa dingtang dingtang dolrangba Union Home Minister-ko grongna nangniktokengani gimin ua Shillong-ona re·baani somoio NGO-rangna somoiko on·china gita Union Home Minister-ko mol·molataha ineba Chief Minister parakataha.
“ILP-ko dabienggipa dolrangna somoiko on·china gita chinga bi·atede nimanaha indiba da·o dipet chinga iani giminde maming aganchakaniko man·sokujaenga. Anga ka·donga ua NGO-rangnaba somoiko on·gen,” ine Sangma aganaha.
Amit Shah-ni re·baani somoio a·dokni nangchongmotgipa kamrangni bidingo agangrikgen ine talatangengon, “Anga an·tangba iarangni bidingo Union Home Minister baksa agangrikgen aro uamang maiko aganchaka uko nina nanggen,” ine Chief Minister parakataha.
