By Norah Sangma
Re∙anggipa antio je Nagaland-oni A∙chik chadambe sakgni Gurugram, Haryana-o ong∙rongija bewalo siahachim, iako knae an∙ching sakantinan aiao inmanani aro ka∙a be∙ataniko ra•baaha. Haryana Police ni aganani gitade sianggipa Samuel Sangma an∙tangko so∙ote siaha ine janapaha. Indake ong∙genchimoba uni ma∙a-paa aro ma∙drangrang aro ripengskarangni aganani gita de ua suicide ka∙ja indiba saobasa uko so∙otna nanga ine kobor ra∙timgiparangni uamang baksa agangrikanio janapaniko nikna gita man∙skaaha. Maina uni manggisini be∙eni bakrango mata-bu•anirang bang∙en gnangchim aro an∙ching sakantian social media-o viral ong∙enggipa photo aro video-rangoniko sianggipani mikkango mata-bu•anirang ba ripomanirangkoba nikna man∙ahachim. Bebe gita ua an•tangko so•ote sigenchimode uni mikkangrango mata-bu•ani chinrang ba ripomanirang maidake dongskaaha? Na∙a banoba an∙tangko so∙ote sigipa mandeni bimangoniko mata-bu•anirangko ba ripomanirangko nikahama? Uni mangisiko nikon uko bilongbee doka sataniko dakaha ine an•ching nikna man•a. Ian an∙chingna dingtang dakgipa chanchiani gisikrangko nabaata aro aiao inmanata!
Apsan daken uni ma∙detang Lt Rosy Sangmakoba ALFAA hospital-o sananio ua saanirang namkalahachim ine agana, indide uni rang∙gitik sianira maini a∙sel ong∙skaa? Aganani gitade sagipana ka•singipa cha•ani ringanirangko (ice cream) cha∙na on∙aha ine knaaha aro uko cha∙en ua janggi galaona sokjolaha. Ia katta an aiao inmangipa ong∙a maina darang hospital-o mangba saksa sagipana jean ICU-o donggipana maming dakgipa cha∙ani aro ringaniko on∙rongja. Indakode ua hospitalni Doctor-an uko so∙otahama ba maiba namgijako una dakahama? Ma mai a∙sel ong∙manchaahachim uko darangba uijaha. Uni gimin ia pilak obostani gimin talbate ma∙sina gita sing∙sandianirangko dakna nangchongmotenga aro uarangko chu∙sokatna gita nang∙ni angni jakon ong•a maina an∙ching da∙o jrip donggenchimode changsao apsandakgipa obosta nang∙ona ba angona soknaba gnang.
An∙ching a∙dokni Chief Minister Conrad Sangmaba saksa A∙chik jat ong∙pae, sianggipani nokdang rang baksa agangrikaha aro ua obostani gimin talbate sing∙sandianirangko dakna nanga ine kobor ra∙timgiparangna agan-janapanirangko niksoaha. Apsandaken an∙chingni MP, Agatha Sangma, Union Home Minister Amit Shah-na chittirangko sedoataha aro Opposition Congress dolni dilgipa Pa Mukul Sangmaba, Union Home Ministerna chittirangko sedoataha. Unbaksana Garo Hillsni dingtang-dinggtang NGO-ni dilgiparang-ba sianggipa chadambe sakgnini gimin kakketgipa obostako u∙ina gita aro sing∙sandianirangko dakchina gita dabianirangko aro ku∙monganiko mesokna gita Garo Hills-ni dingtang-dingtang biaprango re•jome dabianirangko dakangkuenga. Garo Hills-osan ong∙aija indiba dingtang dingtang Noth-Eastni biaprango jerangon A∙chik jatrang songdongengachim pilakan kakketgipa bichalko on∙na dabianirangko dakenga.
Indake ong∙genchimoba Turani MDC aro a∙dokni BJP dolni Vice President Pa Bernard Marakkode ma•mong sorkarina maming official lekka sedoanirangko da.ona kingking an•ching nikujaenga. Ua an•tangan saksa BJP dolni dilgipa ong•e ma•mong sorkari baksa altubee agan-golpogrike iani bidingo sing.sandiarangko dakchina mol•molna krabatgipa mande saksa ong•achim. Apsandaken da∙alona kingkingba Haryana sorkarini gita ua obostani gimin maming dakgipa ja∙ku de∙anirangkoba an∙ching knakujaenga. Ma BJP dolde gimikan mande so∙otgipa dolna chakgipa dolrangan ong∙ama? Ma ua sianggipa chadambe sakgni-ra chongipa jatoni aro North-Eastni ong∙ani giminsa dal∙e ra∙jaengama? Uasan ong∙aija, je dakgipa obosta Nort-East o songdongenggipa jatrangni kosako niam gri ong∙gija dakanirang bang∙en donga. Indiba pangnan dal∙dalgipa dilgiparang ku∙rang on∙rongja aro dal∙dalgipa news channelrangoba agananirang aro mesokanirang dongja. Ia kamrangchin an∙ching North-Eastni manderangko dal∙e ra∙gijanirangko aro onchepanirangko nikna man∙enga.
Uni gimin an∙ching sakantian dal∙gipa, chongipa, ramram mande aro a∙dokni dilgiparangba da∙alon ku∙mong nangrime krimkro kam ka∙e sianggipa A∙chik chadambe sakgnina chong∙motgipa obostako ma∙sina gita sing∙sandianirangko dakna aro kakketgipa bichalko man∙kujana kingking dondikgija ku∙monge kamrangko ka∙na sakantikon mol∙molna kusi ong∙bea.
(The views and comments expressed are purely of the author and Hub News is not responsible for them in any way)
