Shillong, June 10: K-9 ‘Trainee Police Dogs’ ba train ka•ako man•gipa police-rangni achakrang baksana uamangko jakkalgipa police-rangna Sukrobar salo, passing out parade-ko Shillong songjinmani Golf Links sambao donggipa Meghalaya Police Training School-o ong•atangaha.

Training-ko matchotanggipa ia K-9 unit-ni achakrang da•o Meghalaya Police-ni K-9 dolo bak ong•paegnok.

Ia program-ko ong•atanio Meghalaya a•dokni Director General of Police (DGP) LR Bishnoi, mongsonggipa sokgipa ong•e jinmana aganprakangengon, adita salrangna skangsan Meghalaya Police-o achak mangbriko kamna ra•napna man•aha aro achakrangna skie on•gipa manderangni rakbee kamko ka•anichi jaskuni gisepon mang 12 achakrangna skie on•na man•aha ine parakataha.

Meghalaya a•doko pekatgipa bosturangko jakkalani aro badinganirang batrorobaengani gimin ia police-rangni achakrangna dingtangmancha training-ko on•aha ineba Bishnoi parakataha.