29.2 C
Tura
spot_img

Kam bon·atanina jingjengatenggipa skigiparangni kosako Tripura police ja·ku de·ata

Must read

Agartala, Jan 27: Kam bon·atako man·gipa pilak skulo skigiparang jemangan gital kamrangko on·china gita sorkario dabieming mija bilsi December jani 7 tarikoni intal noktoprangko rikeming asonge jegalanirangko dakbaengachim, uamangni kosako da·al Butbar pringo chong·motan uamangni jingjengatani da·al sal 52 ga·dapo uamangni tom·tom asonge jegalaniko dakchakenggipa biaprangko Tripura police pe·rurue gala baksana jingjengatenggipa sak ritchamangna bata skulo skigiparangkoba rim·chomchome ra·angaha ine police-oniko koborrangko man·soaha.

Indake ong·engon, uamangni kamrangko bon·atani bidingo sorkarini gita maiba namatani cholrangko dake-ka·e on·na man·jagenchimode, uamangni jingjengataniko da·ona bateba rakbatgipa ja·kurangko de·angskagen ine kam bon·ata man·gipa sak 10,323 skulo skigiparang mija anti Sukrobar salo a·dok sorkarina sal-bri somairangko on·e mikrakataniko on·angahachim.

Skigiparangni kamrangko bon·atani gimin sorkarini kosako jegale jingjengataniko dakna a·bachengani ja·manon uamangoni sakgni skigiparang an·tangtangni janggiko so·ote siangaha.

Ja·pangoniko koborrangko man·soani gita, da·al Butbar pringchibara a·dokni police aro paramilitary sipairang skigiparangni asonge jingjengatenggipa “Gana Dharna” ona re·angeming uamangni noktoprangko pe·ruru-pe·chichie galetokaha. Iani bidingo skigiparangni matnange aganani gita, uamangni mitam dilgiparangko Butbar pringwalonin police-rang rim·e ra·angaha.

Mongolbar salo, a·songni jakgitelanina kusi ong·e a·songni dingtang dingtang biaprango maniangani attamo jingjengatgipa skigiparang a·dokni skotong songjinma Agartala-o bilcham so·e re·jomaniko ong·ataha aro Butbar salo uamang an·tangtangni nokdangko mikkangchi janggi tangdilanina maidakgipa cholrangko am·e aro dake on·angskana miksongenga uarangko skotong minister-o sing·doangna gitaba uamang agan-parakatahachim.

Unomiting, skulo skigiparangni jingjengatengani obostarang bate namroroangjana kenchaksoeming a·dokni skotong songjinma Agartala jolgimikon district administration, CrPC-ni section 144 -ko ra·gatataha ine koborko man·soaha.

Iani bidingo, a·songni chubatsranggipa kachari Supreme Court-ni raiko on·angani gita, batanggimin 2010 oni 2014 bilsirangni gisepo Tripura a·dokko Left Front-chi sason ka·miting somaio skulo skigiparangko mande rim·aniara niam ong·jachim, indaken uamangni kamrangko mija bilsi March jani 31 tariko bon·ataha. Indake ong·genchimoba, 2018 bilsio Tripura a·doko vote pu·onatani somaio uamangni kamrangni bidingo pilak neng·nikanirangko namate on·na gita BJP dol ekeksinna skang ku·rachake ka·dongatani kattarangko on·angskaahachim.

spot_img

More articles

spot_img
-->

Latest article