Shillong, March 7: A·dokni LP skulrango skie on·enggipa Meghalaya Government Lower Primary Schools Contractual Teachers’ Association, uamangni kamrangko on·pilchina dabie sorkarini kosako jegale sima-gri okgimu chake jingjengataniko dakatengani da·o chu·gimik saldok gapaha.
Iani bidingo koborni manderangna agananio, uamangni neng·nikanirang aro dabianirangko a·dok sorkari knachakgija dongna man·jawa aro uamangna kraa bichalko ka·e on·na nangchongmota aro uamangni kamrangko sorkari on·pilna nanga ine okgimu chakao bakko ra·enggipa skigipa saksa B Nongbri, sorkario dabiangaha.
Indake ong·engon, skulo poraigiparangko mikkangchina tarisoanio aro uamangko bimang ong·atanio indita bilsirangna on·kange kamko ka·bagenchimoba LP skulrango tikana skie on·enggiparang da·o an·tangtangni mikkangchi janggi tanggnini gimin maming ka·donganikon nikatskajaengaha.
Ia mamlao a·dok sorkari knachakgija dongdamaha ine an·tangni suk on·gijaniko parakatengon, uamangni neng·nikanirangko namate ia mamlako bon·atna gita sorkari uamang baksa agan-golpogrikna cholrangko on·na nangachim ineba Pa Nongbri aganangkuaha.
Uamangni skia-porani gadangrangko nie, ning·tue chanchirimen ru·uta bilsirangna skang a·dok sorkari uamangna ia kamko on·aha indiba, je kamna skigiparang ding·ol-kramchie uamangni kamtangtangko namniken on·kanga gnang ru·uta bilsirangna ka·baahachim ua skigipani kamrangko da·o maming a·sel grian sokari bon·atna ja·ku ga·baskaenga ineba ua agandapaha.
Skigiparang jemangan da·omiting Shillong, Malki jolo okgimu chake jingjengattokengachim uamangoni mitam sibokako aro mitamrang sko saa aro ok-chepang saanirangko man·tokanichi ia dakgrikaniko bang·a neng·nikanirangkon uamang chagrongna gita nangtokenga.
Janapjolna gita, LP skulo skigiparang Meghalaya Government Lower Primary School Contractual Teachers’ Association (MGLPSCTA) ni bimango ku·cholsan nangrime mija March 1 tarikoni intalan sima dongija okgimu chake sorkarini kosako jegale jingjengataniko ong·atenga. Sorkari, uamangni kamko on·pilna nanga aro MTET porikkako sena gita uamangna cholko on·na nanga ine uamang dabitokengachim.
Iani gisepon, Meghalaya Teachers Eligibility Test (MTET) porikkao name chu·sokgijagipa skigiparangna tikka on·e skulo skiatani kamrangko bon·atgnok ine a·dokni Education minister Pa Lakhmen Rymbui uamangna aganangaha.
