Boko, Jan 11: Kamrup Forest Division-ni saliram jolo mongma sokbae manderangna jajrenganiko on·ani salsabatbat batroroenga. Mongma matte mangsa kal·akani a·sel Budbar pringo bilsi 43 ong·gipa Anil Rabha Kathabari songo siaha.
Santipur songni Robin Rabhani aganani gitade mongma uamangni songona Budbar pringni 4 bajimango napbaon ua Forest Departmentni manderangna kobor on·eaha. Unon Forest Departmentni manderang uamangni songko wene nie re·angpilaha. Uni ja·mano mongma matte songni manderangko charuru dokruru dakaha. Gipinrang kate jokna man·ahaoba Anil Rabha katsrapjae a·damon siaha.
Ua a·sel West Kamrup Forest Division office-oni kilometre 10mang chel·ao ong·aha.
Robibar attamoba Borkhal songni Kamaleswar Boro minggipaba rong·ma onjetao janggitangko gimaataha. Nam Santipur aro Borkhal songni manderangni chanchiani gitade ua apsan mongma mattean uachinaba sokange kal·akeaha.
Mongma matte wenjojoe kal·akengon ua songgnini manderang namen jajrenge dongna nangenga. Waloba tuna man·gija walsengna nangani gimin iani bidingo maikoba dakchina gita uamang Forest Departmentko mol·molaha.
Ia mangnamgija mongma matteni bidingo ja·ku de·na gita uamang WWFni officialrang baksa chanchirimenga ine Kamrup West Division-ni DFO Dimpy Bora aganaha.
“Mongmako tusiatgipa samchi gochina gita songni manderang aganenga, indiba uan nambeade ong·ja, maina basakobade ua samko jakkalon mongma sijolanga” ine DFO Dimpy Bora aganaha.
Indake ong·engon, batanggimin jagittamni gisepo mongma bi·sa manggni Assam aro Meghalaya sima-ari Hahim jolo siaha.
Iakoba poraie nina man·gen: Rahul Gandhi pantekuengani gimin nomilrang bang·en sokbatokgen: AIUDF-ni dilgipa agana
Watch
