Tura, June 8: NPP-na vote on·na neng·angpilahama, a·songo right wing politics draprorobae BJPni sason ka·ani gimin kenchaksoani giminma, mamingni daman tang·dororoengani giminma, Manipuro so·sojengjeng ong·ani giminbama?
Ia changni Lok Sabha election ja·man India a·song gimikon aganchakna man·gija sing·anirang nakataha. Prime Minister Narendra Modinaba ia sko saani ong·aha, maina BJP an·tangtangrara sorkariko rikna majority man·jae gipin dolrangko bakrimna nangaha.
Indake ong·engon, Garo Hillsoba election resultko agansogipa bang·ani kattakon pe·aha, maina June 4 tariko resultko parakaton changgitam joljol MP ong·gipa NPPni Agatha K Sangmako 1.55 lak voterangchi amatakosa nikaiaha. Uan Congress aro NPP dolgninan chanchisoa gita ong·jaha ine niktokaha.
Bilsi 20na skang ia biap Congress dolnian ong·achim, indiba PA Sangma Congressoni ong·katahaon Turao MP ong·na man·aniko Congress jaktuataha. Uni gisepon, NPP dolko bikotchengaoni ian skanggipa changna ma·mongo MP saksaba gri ong·chengaha; PA Sangmani nokdangna ian bilsi 47 ja·mano rama bon·chongdikani ong·chengaha.
Garo Hillsni politikso maini gimin gitik gitak indake ong·aha ine darangni golpoanion nakatenga.
Bilsisasan re·angkua, MLAna pu·onsusaanio Garo Hillsni dam 24 biaprangoni dam 18o NPPni manderangan chetokaha. Indiba uni kri ia changni MP electiono bikpil ong·skaaha.
Kangal cha·anianiko chel·atna aro manderangna janggi tangani dingtang dingtang cholrangko on·naa Chief Minister Conrad K Sangma kam ka·beahani gimin re·anggipa bilsini assembly electiono nambee chu·sokaha ine manderang agantokachim. Bilsisani gisepo indakpile dingtanganikode nikrongjachim ine manderangni sing·ani nakatenga.
Indide, Chief Ministerni kamrangko manderang namnikengode ia changni MP electiono uni dol NPPna maikaisa indake ong·skaaha?
Electiono somoio wenroroengon kobor ra·timgiparang, Conrad Sangmani kamrangko maidake nika manderango sing·rongaha. Rural economyko tang·doatna aro kangal cha·asiako chel·atna bikotgipa projectrangni banoba banoba somoi ra·engana suk ong·gijako aganana agrede manderangni gisepo Conrad Sangmako chu·ongnikgija agangipako knanan neng·a. Chief Ministerni kamrangko namnikenga ong·ode maini giminsa uko watgale an·piltokaha?
Ia sing·anirangna bang·batani aganchakanian BJPni a·sel ine ong·battokaha.
Ma·mongni poltikso maikai ong·a aro chonchongipa a·dokranga uano maidakgipa bak-rengsi dongpaa uko Conrad Sangma namen u·ia. Uan mongsongbate Northeast a·dokrangni tangka-paisana Ma·mong Sorkario pangchakna nangani ong·a. Uarango pangchake, a·doko sorkariko rikenggipa ong·ani gimin, man·gnirangko altubate ra·bana gita NPP dolba Ma·mongko rikenggipa BJPni dolming bakrimna nangnikaha ine Conrad Sangmani aganako knaronga. Indiba uan manderangni gisikrangko chinapatna man·jaha ine election resulto niksoaha.
CAA-na jing·jengbemiting salrango Conrad Sangmakon Northeast gimikni ku·rang ineba agantokaha aro bang·an uko “Hero of the Northeast” intokaha. Indake uni kamrang chu·sokrorobae ua Northeasto saksa ku·rang on·gipa ong·engachim.
Indakmitingon mai ong·aha?
Conrad Sangmani aganani gitade, NDA baksa bakrimania namroro-silroroaniko bang·bate ra·bana ine ong·a. Indiba golpode dingtang dake ong·katskaaha.
Mai mairang ong·aha, mitamko niatna.
Garo Hills 6th Schedulechi chel·chakako man·gipa a·dok ong·oba Citizenship Amendment Act-ko ra·gatahaon a·paloni manderang naprurubana man·gnok ine bang·an kentokaha. Manipuro Christian toromgipa ra·gipa Kuki manderangko uamangna bang·batgipa aro Hindu toromko ra·gipa Meitei manderangni sinjetaniko nikon, BJPni sasono kenbeani ong·gen ine an·skittokaha. Hindutva-o bilakenggipa Himanta Biswa Sarmani sason ka·enggipa Assam a·doko missionary schoolrangko chadrapanirangko nikon Garorang chakna man·bajaha.
Gipin a·selrangba nakataha. Cha·anirangni dam rakroroani, gas cylinder te·sani dam bariani aro kam gri ong·e donganirang bariroroengon manderang dingtanganiko nangnikaha.
Iarangni gisepo mongsonggipa mingsara Indiani Constitutionko mitam BJP dilgiparangni dingtangatna katta naatanian ong·aha. Ia cholko ra·e, a·doko BJPni dol ong·e dongenggipa NPPko nengraen goteke roatna man·aha. Indakmiting chachaon, “NPPna vote on·ade Modina vote on·aan ong·gen” ine Conrad Sangmaba biap damsao aganmansrangaha. Haida, Hindu ong·gijagiparangni kosako sinjetgipa ine manderangni nidikgipa mande Modiko gisik ra·na Conrad Sangma gualahakon.
Electionde matchotangaha, NPP aro Chief Minister Conrad K Sangma jaktangni mesrangko nolona rimbapilna man·genma? Ma salo ramo ran·jajok, chio su·o taljajok ine dongaignokma? Iarangkode re·baenggipa salrangosa u·iaignok. Nama kamkoba aro namgija kamkoba jinmade gualningaia ine aganani gnang. Uan ong·bebegenma, somoisa aganna man·aignok.
Na·simang ia video-koba nina man·gen:
Na·simang iakoba poraina man·gen: Chanchichipenggipa bobil dolrang Jiribram-ni police outpost-rangko chadrapa
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- https://www.instagram.com/ne_media_hub
