Guwahati, May 19: Assam-ni mingsingbegipa biap damsa, Kaziranga National Park aro Tiger Reserve (KNPTR), re•anggipa 2023-2024 bilsioni tourist-rangni bang•bataniko nikna gita man•aha. Indake 2023-2024 bilsirango chu•gimik lakh 3,27,493 mangni gita tourist-rang Kaziranga-ona re•batokaha.
“Kaziranga National Park-ko tourist-rangni nina re•baaniara, Assam a•doko tourism-ni gita namen tang•doaniko ra•baaha, aro ian Skotong Minister Dr Himanta Biswa Sarma-ni dilanichi tom•tom ong•aniko ra•baanichisa chu•sokna gita man•aha, aro uni chalaienggipa sorkarini jotton ka•anichisa bobil dakgipa dolrangkoba gimaatna man•aha aro unbaksanaba so•so jengjeng ong•gipa biap inako man•aoni kenanigrigipa aro pilakkon ka•sae ku•si ong•e nokchakgipa biap ine bimungko man•atna dakchakskaaha,” ine Assam-ni tourism minister Jayanta Mallbaruah aganangaha.
“A•doko tom•tom ong•aniko rakkianiko nikenba, tourist-rangko ka•dongatna gita man•aha, aro tourist-rangko Kaziranga-ni nitobegipa biaprangko re•bae nina gita didiataniba ong•aha. Assam a•doko rama jallangrang namdapatani ba daldapatanian ia tang•dobatatanio mongsonggipa ong•enga. Uasan ong•aigija, Guwahati airport-rangko dalbatatani baksana bang•a gital gital bakrobegipa sorok aro dollongrangko tarianichi, Assam a•dokona songrebana gita namen altubatataha,” ineba Minister aganangaha.
“Prime Minister Narendra Modi-ni, Kaziranga-ona re•baenba, ia park-ni dingtang dingtang sam bolrang aro nikronggijagipa janggi gnanggipa matburingrangni gimin aro dingtangmanchagipa jatni namgipa dakbewalni giminba talate on•angaha. Ia indake dakaniara Kaziranga-kosan ra•doani ong•aija indiba channa ampilgija tourist-rangkoba ianona re•bae mikrontangchi nikatna gita gisiko didiani ong•aha. Ia pilakan, Kaziranga-ko mingsa mongsonggipa ine tourism-map-o me•sokaniko man•an baksana a•dokni tourism-koba tang•dobatataha,” ine Jayanta Mallbaruah u•iataha.
Bilsi 2021-2022-ko nambatgipa bilsi ine agana man•gen, maina October 2021 bilsioni May 2022 bilsiona chongmotan tourist-rangni re•baani somoio, lakh 2.75 tourist-rangko nikna gita man•aha aro tangka gong crore 6 mangni gita tangka paisarangkoba man•aha. Pangna bilsian ia park-ona chu•gimik lakh 1.8 tourist-rangko nokchakronga.
Kaziranga National Park, ian ong•telaigipa nitogipa biaprang baksana nikronggijagipa sam bolrang aro matburingrangan gapgipa biap damsa ong•a. Jeni apalanian 430 sq km mangni gita ong•gen, aro ian UNESCO-ni World Heritage Site ge•sa ong•a, jean grong ge•sangipa gondu-na mingsingako man•gipa biapba ong•a.
Na·simang ia video-koba nina man·gen:
Na·simang iakoba poraina man·gen: Agra-o jutta badinggipani nokoniko gong cr 60 tangkarangko Income Tax official-rang man·a
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- https://www.instagram.com/ne_media_hub
