Shillong, June 26: Adita salrangna skang, Kerala a·dokni chadambe sakgniko Shillong songjinmani Jaiaw-o donggipa Roberts Hospital sambao, kragija dake saljrakjrakon chadrapahani gimin, ia chadambe sakgniko chadrapgipa dolsa chadamberangni kamko Thma U Rangli Juki (TUR) raken jegalataha.
Koborko on·ani gitade, Shillong-o poraienggipa Kerala a·dokni chadambe sakgni, ua somoio misal cha·na gitasa a·palona ong·katangengachim.
Iandake gipin a·dokni dosgri chadambe sakgniko kragija dake chadrapani gimin jegalatengon, gipin biaprangoni re·bae poraienggipa ba kam ka·enggipa manderangko Meghalaya a·dokni aro Shillong songjinmani manderang an·tangtangde chadraprongjachim ine ia chadambe sakgnina chake agangipa jolni manderangkoba TUR mittelpilangaha.
Iandake manderangni kosako chadrapanirangko mitamrangkode police-rangna u·iatenga indiba mitamkode ma·siriktokjaenga ine janapatengon, ia a·selni bidingo ta·raken am·sandianirangko dakenba, a·dokna aro jatna namgija bimingko ra·baenggipa manderangni kosako rakgipa ja·kurangko de·china TUR-ni dilgipa Angela Rangad, Meghalaya Police-ko didiataha.
