Shillong, Sept 15: Khasi Hills jolgimiko A·chikrangni songdongenggipa songrango donggipa Garo Medium LP school-rangona A·chik skigipako ong·gija gipinko seoke watatani gimin Headman association aro AKHAF, GSU nangrime, a·doko bil-sasonko jako ra·enggipa MDA sorkari aro Education department-ni kosako jegalaniko dakenba A·chik skigipako kamo rakkichina dabie Non-Cooperation Movement (NCM)ko Bristibar salo Konjoi songo ong·atangaha.
Iani bidingo AKHAF-ni padot Clivestar Marak-ni koborna aganatani gita, Khasi Hills-ni Garo Medium LP school-rango A·chik ong·gijagipa skigipako seoke watatanichi Garo-ko name poraina man·jani a·sel poraienggipa A·chik bi·sarang namen neng·nikaniko man·tokenga aro iana uamang namen suk ong·ja, maina skigiparangni ku·sikko bi·sarang u·irikna man·tokjaenga aro mitam ma·gipa-pagiparangde bi·satangtangkon skulchina watatnan siktokjaengaha ine parakataha.
“Chingni A·chik jat ong·aniko aro ku·tangko ripingna aro chelchakna gita chingo bil donga jenan uandakgipa skulrangona A·chik skigipako seoke watatchina gita chinga raken dabia aro sorkari ia dabianirangko knachakja ong·ode, chingni ja·ku de·aniko dontongjawa” ine janapatan baksa, organisation-ni dilgipa ia mamlako nirokatpachina gita a·dok sorkarikoba mol·molatjolaha.
